Actualizado
Comentarios
O xuíz Ismael Moreno impón unha fianza de 44 millóns ao capitán do Pitanxo e a dous directivos de Pesquerías Nores
O maxistrado da Audiencia Nacional acorda enviar a xuízo oral ao administrador do grupo de Marín, ao director de flota e ao capitán do barco sinistrado por 21 delitos de homicidio imprudente.
Homenaxe en Marín aos 21 falecidos no afundimento do barco pesqueiro Villa de Pitanxo en augas de Terranova en febreiro de 2022. Foto: Gustavo de la Paz / Europa Press
Comentarios
O xuíz titular do xulgado central de Instrución número 2 da Audiencia Nacional, Ismael Moreno, acordou abrir xuízo oral ao capitán do Villa de Pitanxo e a dous directivos da empresa armadora, Pesquerías Nores, pola morte de 21 tripulantes do barco durante o naufraxio ocorrido en augas de Terranova en febreiro de 2022. Ademais, impónlles unha fianza de 44 millóns de euros para garantir as responsabilidades que se poidan impor na sentenza.
Segundo informa a Audiencia Nacional, o maxistrado acordou enviar a xuízo ao administrador de Pesquerías Nores Marín, José Antonio Nores Rodríguez, ao director de Flota, José Antonio Nores Ortega, e ao capitán do barco Juan Enrique Padín por 21 delitos de homicidio por imprudencia grave e un delito de lesións imprudentes en concurso ideal con outro delito contra os dereitos dos traballadores.
Na súa resolución, na que recolle os escritos da Fiscalía e acusacións particulares, o instructor sinala como responsable civil subsidiario á mercantil Pesquerías Nores Marín SL e á entidade aseguradora British Marine Luxembourg SA como responsable civil directo.
Fianza
En concreto, Moreno require aos tres acusados “para que no prazo dun día depositen 44 millóns de euros como fianza para garantir as responsabilidades pecuniarias que se lles poden impor na sentenza e require á responsable civil subsidiaria, Pesquerías Nores, a prestación da mesma cantidade de forma solidaria cos tres anteriores, así como á responsable civil, a aseguradora British Marine Luxembourg”.
Ademais, cita aos tres acusados e ao representante legal de Marisquerías Nores o próximo 28 de xullo para entregarlles o auto de apertura de xuízo oral.
