A CIG estima que a fusión co BBVA destruirá tantos empregos como os que ten o Sabadell en Galicia.

Os sindicatos do Sabadell manifestaron claramente a súa oposición a unha fusión co BBVA. Entre eles está a CIG, o principal sindicato en Galicia, que emitiu un dictame respecto á posible integración das dúas entidades e que o propio Sabadell remitiu á CNMV. No escrito, a central sostén que o seu principal temor é unha redución “brutal” de persoal se a opa, xa autorizada polo regulador bursátil, chega a bo porto.

“Entendemos que se o BBVA promoveu esta operación foi por unha cuestión de beneficio empresarial e, como no resto das operacións entre entidades financeiras, ao final, o pretendido beneficio empresarial conséguese en grande medida, cunha redución brutal de persoal“, sinala a CIG nun escrito datado este 12 de setembro.

Segundo os datos do sindicato, ao peche do primeiro semestre deste exercicio, o BBVA contaba con 789 traballadores en Galicia, mentres que o Banco Sabadell tiña 375 empregados. “Estimamos que unha fusión ao uso, poría en perigo practicamente a totalidade dos postos de traballo equivalentes á plantilla do Banco Sabadell en Galicia”, apunta.

A CIG xa pensa no ERE

O sindicato sinala que, pola experiencia de outros EREs, a entidade absorbida é a que reduce un maior número de traballadores, polo que apunta a un maior impacto no Sabadell. “A única alternativa para as saídas de traballadores e traballadoras, xustificadas por duplicidades, serían o ofrecemento de prexubilacións”, apunta a CIG, que advirte que a mobilidade funcional ou xeográfica debe ser limitada e voluntaria para o empregado.

Ademais, posicionase en contra de procesos de externalización a outras empresas de traballos bancarios desenvolvidos polo persoal de BBVA e Sabadell e solicita que se limite a “presión comercial”, que, segundo asegura, “está provocando no persoal dos bancos un altísimo grao de estrés que repercute negativamente na súa saúde”.

O papel do Goberno

Non ignora a CIG que o Goberno impuxo determinadas condicións ao BBVA para a absorción do Sabadell, como a preservación do emprego e do crédito a pemes durante tres anos, aínda que lembra que o propio banco as recorreu ante o Tribunal Supremo e que a Comisión Europea incoou un procedemento contra o Estado español ao entender que determinadas disposicións da lexislación bancaria vulneran as competencias exclusivas do Banco Central Europeo. “Pode suceder que as condicións impostas polo Consello de Ministras e Ministros sexan anuladas, ben polo Tribunal Supremo ou ben a resultas do procedemento instado pola Comisión Europea”, lamenta a central.

O sindicato tamén lembra que o sistema financeiro en España está adquirindo “características de oligopolio” tras o proceso de fusións e absorcións, que “provocaron que miles de persoas quedaran sen emprego”. No caso de BBVA e Sabadell indica que no ano 2021 executaron EREs que afectaron a 2.900 persoas, no primeiro caso, e a 1.630 no segundo.

Oposición dos sindicatos

A CIG comparte posicionamento co resto de sindicatos con representantes no Sabadell, pois todos expresaron o seu rexeitamento á opa nunha serie de ditames remitidos ao consello de administración da entidade financeira. Ademais da organización galega, remitiron escritos UGT, Intersindical, Euskal Sindikatua e Sindicato Independente Grupo Banco Sabadell (Sicam).

UGT, que remitiu o informe máis extenso dos catro, manifestou a súa “oposición firme á OPA hostil” lanzada por BBVA. A forza sindical indicou que o seu rexeitamento basease nunha análise das repercusións económicas, laborais e sociais que emanan de varios informes encargados polo propio sindicato, incluído un á Universidade Autónoma de Madrid.

Así mesmo, a agrupación de traballadores prevé a destrución de entre 7.500 e 10.500 empregos directos, tomando en consideración unha franxa entre o 40% e o 55%. Esta franxa axústase a unha destrución de emprego do 45,5% das plantillas de bancos absorbidos, que é a media que se produciu en España nas fusións anteriores “máis significativas” examinadas por UGT. A central tamén criticou que se producirá un deterioro das condicións laborais, un “peche masivo” de oficinas e unredución do crédito dispoñible de ata 54.000 millóns de euros.

Pesimismo sindical

Do seu lado, A Intersindical considerou que a destrución de emprego podería ser de 5.400 persoas, extrapolando as cifras do último expediente de regulación de emprego (ERE) de Banco Sabadell. Tamén se opuxo ao peche de 300 oficinas que prevé BBVA. “As experiencias das últimas entidades absorbidas por BBVA non nos dan ningún motivo para ser optimistas”, aseguraron este sindicato.

Euskal Sindikatua manifestou que “non é admisible que os custos dos axustes que puidese acabar xerando unha operación destas dimensións recaian sobre as plantillas a través de medidas traumáticas”; mentres que Sicam manifestou a súa “firme oposición” á OPA por ser unha “grave ameaza” para os dereitos laborais de empregados e para a estabilidade do sistema financeiro.