A Xunta cualifica de “errónea e daniña” a sentenza do TSXG que anula un parque eólico e anuncia que recorrerá.
A conselleira de Medio Ambiente critica a decisión do alto tribunal galego de suspender un proxecto en Mazaricos por motivos ambientais a pesar da resolución europea que daba a razón á Xunta no seu método de tramitación.
Varios aerogeneradores en el parque eólico de Vilachá, a 15 de marzo de 2024, en Lugo. Carlos Castro – Europa Press – Archivo
Comentarios
Intensifícase o conflito entre a Xunta e o Tribunal Superior de Xustiza de Galicia (TSXG) polas decisións do alto tribunal vinculadas aos proxectos eólicos. A conselleira de Medio Ambiente e Cambio Climático, Ángeles Vázquez, cualificou de “errónea” e “danosa para o medio ambiente, para Galicia e para a economía” a sentenza coñecida este martes que anula un parque eólico en Mazaricos, A Coruña, por motivos ambientais.
Trátase da primeira sentenza a un proxecto eólico tras a resolución do Tribunal de Xustiza da UE (TJUE) que deu a razón á Xunta na tramitación de proxectos renovables. Con todo, o tribunal galego suspende neste caso o parque atendendo ao posible dano ambiental e non á tramitación, que quedou despejada tras a decisión de Bruxelas. O Goberno galego anunciou que recorrerá o fallo.
“Sempre hai unha escusa”
A conselleira de Medio Ambiente considera que a sentenza do TSXG lle dá a razón á Xunta porque “ninguén foi quen de demostrar que este parque era nocivo para o medio ambiente, “pero sempre hai unha escusa e esta escusa consiste en seguir paralizando o desenvolvemento das enerxías limpas e das enerxías verdes”, segundo considera, por motivos de “forma”.
En declaracións durante unha visita a Foz (Lugo), onde visitou as obras de mellora do saneamento da localidade, criticou que esta sentenza desautoriza as autorizacións administrativas concedidas polo Tribunal Supremo e polo Tribunal de Xustiza da Unión Europea.
Engade que esta sentenza está baseada nunha “cuestión de forma”, xa que os maxistrados basan a anulación en que a declaración de impacto ambiental se limitou ao parque eólico cando tiña que ter realizado de forma conxunta coa da liña eléctrica de evacuación, “cando o TS di que non é así”. Vázquez aclarou que as liñas de evacuación deben ser compartidas “para evitar ter Galicia chea de postes e cables” e que esa liña “xa lle dá servizo a outro parque e xa foi analizada”.
“Alguén ten que facerse responsable”
Por iso, a conselleira considera que é unha “sentenza errónea que debería revisarse” e, se isto non é así, adianta que “haberá que recorrer de novo ao Supremo”. Ademais, reclamou que “alguén ten que facerse responsable do que está sucedendo”, xa que esta situación o que está provocando é que: “Non cumpramos os obxectivos marcados, e incumprir é non chegar ao ano 2040 con esa neutralidade climática que todos pregamos e queremos”.
Asegura que medidas como esta provocan “que se sigan emitindo á atmosfera 2,5 millóns de toneladas de CO2”.
