Besteiro marca as municipais de 2027 como «primeira meta» clave do PSdeG.

José Ramón Gómez Besteiro fixou “a primeira meta” dos socialistas galegos nas eleccións municipais do ano 2027. O secretario xeral do PSdeG asegurou que afronta eses comicios con perspectivas positivas e coa confianza de que será “un ano positivo para o PSOE, para Galicia e para España”.

“É un proceso de ir avanzando na busca de atopar aos mellores candidatos, unha posición de referencia cara ao conxunto da sociedade, en definitiva, unha posición que nos refire como un partido claramente municipalista”, proclamou ante máis de 140 militantes inscritos no Comité Nacional que se celebra este sábado en Santiago.

Besteiro iniciou a súa intervención poñendo o foco nun contexto actual de “extraordinaria dificultade” no ámbito internacional e cunha “ultradereita que inflúe cada vez máis nas institucións e na política”.

En Galicia, o líder do PSdeG reprochou a posición “lamentable” dos populares “fronte aos migrantes non acompañados”. “Está o mundo convulso e hai unhas accións políticas que están collendo unha deriva absolutamente preocupante”, subliñou.

Do mesmo xeito, acusou ao PPdeG de asumir discursos que rompen “pactos básicos” como, engadiu, “o consenso contra a violencia machista”, ante o que insistiu que o PSOE é “o único dique de contención”. “Somos a única alternativa fronte a esa ondada”, manifestou.

Eleccións municipais

Así mesmo, o político lucense xa puxo a mirada en maio de 2027, confiando, dixo, “nun ano positivo para o PSOE, para Galicia e para España”.

Nesta liña, referiuse aos municipios nos que gobernan os socialistas, onde son “referencia”, polo que apelou á militancia a situar eses comicios como “a primeira meta”.

Para Besteiro, trátase dun proceso de ir “avanzando” na busca para atopar aos mellores candidatos e lograr esa “posición de referencia cara ao conxunto da sociedade” dun partido “claramente municipalista”.

“Estou convencido de que se somos capaces de poñer cara á realidade local, ao traballo local, ao concreto, todo iso suma nesa acción política que podemos e debemos facer en todo o territorio”, aseverou.

Ademais, avanzou que convocará antes de final de ano o Consello de Alcaldes e Alcaldesas para analizar o financiamento do Servizo de Axuda no Fogar (SAF) e tomar decisións sobre o ataque furibundo que se lle está facendo ao mundo local por parte do PP”.

“É un ataque á prestación de servizos públicos que temos a obriga de defender desde as posicións de goberno e desde onde somos oposición. Esa reunión farase e tomaranse decisións. Apelamos á unidade e á forza que representa este partido en Galicia”, proclamou.

Un PP cómodo co BNG como líder da oposición

Do mesmo xeito, Besteiro aproveitou a súa intervención para reivindicar ao PSOE como “a alternativa á dereita en Galicia” fronte a un PPdeG “cómodo” co BNG como líder da oposición.

Tras recoñecer que a “realidade institucional” no ámbito autonómico” non é “a máis favorable”, apuntou que a posición do BNG como líder da oposición “non é de goberno”, polo que cre que “topa con ese teito visible ou invisible de que se converta nunha alternativa de Goberno”.

Unha posición que, ao seu xuízo, “interesa ao PP” porque “lle permite vivir nunha comodidade electoral”. “Creo que non hai atallos, ese traballo constante vai levarnos a posicións máis positivas, creativas e de maior protagonismo no ámbito autonómico, sumando esas esperas, que somos Estado, autonomía, corporacións locais: ese conxunto é onde se ve representado este partido”, puxo en valor.

Loita contra as desigualdades

Tamén remarcou que un dos obxectivos do PSOE é a “loita contra as desigualdades” fronte á “falta de políticas da Xunta que, subliñou, ten problemas “especialmente graves”: “22.700 persoas esperando vivenda pública, 360.000 galegos á espera dunha cita médica, 349 días de media para resolver unha axuda á dependencia”.

Nesta liña, acusou ao PPdeG de non executar os orzamentos de vivenda, “recortar” en dependencia e non contratar a persoal sanitario suficiente”. “É unha ineficiencia programada. Non hai xestión nin planificación”, lamentou.

Así, finalizou a súa intervención apelando á “unidade” e á “mobilización”. “Fronte á Galicia das desigualdades, aquí estamos nós, traballando para romper un sistema inxusto. Eu vou poñer todo o que teño. Pero isto non vai de heroes en solitario: vai de equipo. Ninguén chega só e Galicia non vai avanzar se non avanzamos xuntos”, concluíu o líder socialista, que este sábado cumpre 58 anos e soprou as velas ao final da súa intervención ante o aplauso e o ‘Cumpleaños Feliz’ coreado polos militantes presentes neste Comité Nacional.

Comisión de listas

Este Comité pretende culminar o proceso de renovación das estruturas do partido, que arrancou coa celebración do XV Congreso do PSdeG.

Así, un dos temas previstos na orde do día da convocatoria deste sábado é a constitución da Comisión Nacional de Listas que, segundo recollen os estatutos da formación, estará formada por membros da executiva do PSdeG e do Comité Nacional. Nela, os integrantes elixidos polo máximo órgano de decisión entre congresos deberán ser maioría.

Entre as súas funcións, emitir un ditame previo á aprobación definitiva por parte do Comité Nacional dos candidatos e as candidaturas nos diferentes procesos electorais.