Despedida a Impulsa, a sociedade público-privada que naceu cos Next Generation e apadriñou a Altri

Impulsa Galicia, sociedade público-privada que naceu en 2021 para buscar proxectos tractores tras a pandemia que puidesen captar fondos europeos Next Generation disólvese “unha vez constatado o cumprimento do seu propósito fundacional”. Así o indican desde a compañía instrumental participada de forma maioritaria pola Xunta de Galicia, Abanca, Reganosa e Sogama.

Mediante un comunicado, a sociedade indica que nos seus catro anos de vida “contribuíu a acelerar a recuperación económica da comunidade autónoma no escenario pospandemia”. “Na súa decisión, os socios tamén valoraron o próximo final do programa Next Generation EU, a evolución nas necesidades do tecido produtivo e a creación, posterior á da propia compañía mixta, de organismos que no seo da administración asumiron o estímulo da cooperación público-privada e o apoio ao desenvolvemento de proxectos transformadores”, explica, para destacar a Oficina de Coordinación Económica da Xunta, a Secretaría Xeral de Industria e a Oficina Económica de Galicia.

Gabinete de expertos

Os seus orixes remóntanse á primavera de 2020, en plena pandemia, cando a Xunta, entón de Alberto Nuñez Feijóo, conformou un comité de expertos para deseñar posibles solucións para fomentar o apoio empresarial. Das deliberacións daquel gabinete saíu a idea de crear un vehículo societario mixto para favorecer as inversións. Destaca a compañía que a idea xurdiu da man de representantes tanto da administración pública como de grupos privados como Inditex e Reganosa, ademais do Banco de Desenvolvemento do Consello de Europa, a Asociación Galega da Empresa Familiar, o Consello Galego de Economistas e o Círculo de Empresarios de Galicia.

Entre outros proxectos, Impulsa abogou por poñer en marcha un proxecto de transformación de fibras sostibles, que derivou na proposta de Altri dunha factoría en Palas de Rei que, de momento, non captou os fondos europeos desexados (a compañía indicou en numerosas ocasións que precisaría captar cerca de 250 millóns de euros en axudas públicas).

Fontes de Impulsa consultadas por Economía Digital Galicia indican que o fin da vida da sociedade instrumental era algo xa recollido desde o seu inicio xa que o seu obxectivo era conceptualizar proxectos, buscar tecnólogos e socios industriais. Neste momento, no que os proxectos a desenvolver xa son autónomos, os promotores xa ‘voan sos’.

Altri, á espera de fondos e conexión eléctrica

Na comunicación na que anuncia a súa disolución, Impulsa Galicia destaca que a súa labor derivou no nacemento de proxectos industriais tractores así como estratexias en pro da economía circular.

“Xurdiron así mesmo plans e realidades máis identificables polo común da poboación, como a empresa mixta Recursos de Galicia (RDG), que asumiu a colaboración público-privada nos ámbitos da enerxía e a minería, e no seu accionariado conviven a Xunta de Galicia con 32 empresas de toda clase que sosteñen máis de 21.000 empregos directos e aportan anualmente un 14 % do PIB da comunidade; o gran centro de datos de Curtis (A Coruña), que promove Nostrum Group; e o programa de xestión sostible dos bosques, apoiado por unanimidade en 2022 no Parlamento de Galicia. Pioneira a nivel mundial, esta última iniciativa, que tras unha concorrencia internacional agora lideran Altri e Greenalia, practicamente concluíu a súa tramitación administrativa e atópase á espera de obtención de apoio económico e conexión eléctrica por parte do Goberno central”.

“Entregamos a Galicia un legado do que nos sentimos orgullosos. Abrimos camiños retadores nunha época especialmente complexa como foi a pospandemia e que afortunadamente entre todos logramos superar. Nun momento de moita incerteza e emerxencia, houbo un grupo de empresas e persoas que se puxeron a traballar co único obxectivo de servir a Galicia para desenvolver un esquema innovador de colaboración. O momento xa é outro; pervive, iso si, o espírito da cooperación público-privada”, valora o director xeral de Impulsa Galicia, Julio Pombo.