Lorenzana anima ás empresas galegas a sumarse á auditoría enerxética de Recursos de Galicia.

María Jesús Lorenzana, conselleira de Economía, convidou ás empresas a participar na auditoría enerxética que Recursos de Galicia (RDG), en colaboración tamén coa Consellería do Mar, está a realizar en polígonos e portos galegos para poder implantar solucións que permitan descarbonizar a actividade industrial e reducir a factura eléctrica.

A conselleira visitou este venres no parque empresarial Lalín 2000 as instalacións de Inasus, unha das empresas que participa nesta iniciativa pioneira en España que se vai desenvolver en 315 polígonos e portos de Galicia (193 parques empresariais e 122 peiraos autonómicos).

Segundo apuntou explicou, por agora os traballos están na fase de recollida de datos para coñecer o recurso renovable do entorno, as infraestruturas enerxéticas dispoñibles (redes de distribución e transporte, subestacións,…) e os patróns de consumo das empresas asentadas. Aquelas que faciliten os seus datos para a análise recibirán un informe enerxético personalizado coas correspondentes propostas de mellora e cunha estimación de aforros e comparativa sectorial.

O obxectivo é ofrecer solucións adaptadas a cada polígono: proxectos de autoconsumo, sistemas de almacenamento, para a mellora da eficiencia nos procesos industriais e, tamén, no ámbito da mobilidade.

“Temos que traballar por apoiar as empresas na descarbonización, na electrificación e na baixada das facturas”, asegurou Lorenzana, quen enmarcou esta iniciativa na estratexia económica da Xunta, que vincula a enerxía ao desenvolvemento industrial.