Lorenzana desmarcase das municipais coruñesas: “Espero e desexo seguir estando na Xunta”
A conselleira de Industria, nun acto con empresarios na Coruña, indica que a candidatura do PP pola Coruña é algo nas mans de Alfonso Rueda e Diego Calvo.
María Jesús Lorenzana, conselleira de Economía e Industria. Xunta
Comentarios
A conselleira de Economía e Industria, María Jesús Lorenzana, declinou este mércores facer valoracións sobre a candidatura do PP á Alcaldía da Coruña de cara ás municipais do próximo ano. O nome da dirixente popular soou nas últimas semanas como posible cabeza de cartel na cidade herculina, aínda que o actual portavoz do grupo municipal do PP, Miguel Lorenzo, xa expresou a súa vontade de repetir.
A conselleira participou nun acto na cidade herculina da confederación de empresarios de Antonio Fontenla. Antes da súa participación no mesmo, atendeu aos medios e, preguntada directamente sobre se podería embarcarse na carreira das municipais, reiterou que o seu desexo é seguir no seu posto na Xunta de Galicia. “Espero e desexo seguir estando, queda moito traballo por facer”, indicou.
“Cousa de partido”
En todo caso, lembrou que se trata dunha “cousa de partido” e apuntou a que a configuración das listas é algo que ten que definir o presidente do partido, Alfonso Rueda, e, no caso da Coruña, o responsable provincial do partido, Diego Calvo.
