Rueda descarta ser ministro se Feijóo chega á Moncloa: “Quero volver a ser o presidente da Xunta”
O mandatario galego sinala que lle gusta a tarefa que desempeña á fronte do Goberno autonómico e que non se sentiría "atraído" por un posto nun hipotético Executivo do líder do PP.
O presidente da Xunta, Alfonso Rueda, nunha entrevista con Europa Press. – CÉSAR ARXINA/EUROPA PRESS
Comentarios
Alfonso Rueda descartou, polo menos por agora, dar o salto á política nacional se Alberto Núñez Feijóo lle ofrece un ministerio. O presidente da Xunta asegura que está “ben” en Galicia, que lle “gusta a tarefa” que desempeña á fronte do Goberno autonómico e que non se sentiría “atraído” por un posto nun hipotético Executivo do líder do PP, aínda que traballará para que alcance a Moncloa.
Así o apuntou nunha entrevista con Europa Press na que, cuestionado se se plantea suceder a Feijóo como líder do PP estatal, o mandatario galego sinalou que “en absoluto” e engadiu que quere volver presentarse ás eleccións autonómicas. “Se a xente me dá a súa confianza, quero volver ser o presidente da Xunta”.
Pactos con Vox
Sobre os pactos do PP con Vox, Rueda considera que se a súa formación non logra suficientes apoios nas próximas eleccións xerais para gobernar “en solitario” España, está “obrigado a conformar maiorías” e é consciente de que o partido de Santiago Abascal estará na ecuación. “O lóxico”, esgrimiu, é que “busque esas maiorías e que se normalicen se son necesarias”.
“Co PSOE actual, con Pedro Sánchez, é absolutamente imposible. El si que pon cordóns sanitarios desde a postura de ter perdido as eleccións”, esgrimiu nunha entrevista con Europa Press o presidente galego, quen declinou censurar decisións de compañeiros de partido noutras comunidades –como a inclusión da ‘prioridade nacional’ nos orzamentos de Valencia–.
Rueda estableceu diferenzas entre “a explicación” de Vox e a que dan os populares. “Eu atendo á dos meus compañeiros, que ao final do que falan é dunha necesidade de arraigamento e de vinculación da xente coa terra onde vive. Se é iso, hai moitas maneiras de chamalo. Está claro que Vox quixo presentalo como un lema, unha bandeira. Pero se é algo racional e entendible por parte dos meus compañeiros, nada que dicir”, argumentou.
Dito isto, insistiu en que el véxoo “desde fóra” –dado que o partido que dirixe Santiago Abascal, por agora, carece de presenza institucional na comunidade–. “Sempre digo que eu non son ningún experto en Vox e engado, con todo o sentido desa palabra, afortunadamente”, enfatizou, antes de engadir que traballará para que “siga sendo así”.
“Creo que é bo para Galicia esta situación de estabilidade e fortaleza”, defendeu, en relación á súa maioría absoluta. Iso si, engadiu que tamén se “rebelou” fronte a quen, ao seu modo de ver, “entenden calquera tipo de pacto con calquera tipo de forza política, tamén extremista, con postulados moito menos entendibles e aceptables que calquera que poida ter Vox”.
E é que, aínda que recoñece que hai “moitos” plantexamentos políticos de Vox que non lle gustan, rexeita que o PP sexa o único partido que “non ten dereito a pactar en ningún caso” cunha forza que alcanza “unha representación importante” nas comunidades autónomas en cuestión.
Moción de censura
Na entrevista, Rueda tamén apoiou a postura de Feijóo de non presentar unha moción de censura a pesar do convulso escenario político estatal se non lle dan os votos para que saia adiante. Considera que “acerta” en non dar o paso, aínda que subliña que é unha decisión que lle corresponde ao seu xefe de filas e da que non falaron.
En todo caso, insistiu en que non ve a necesidade de presentar unha moción de censura “para perdela”, dado que se o obxectivo é “facer evidente que en España hai un desgoberno, non fai falta”. Ao seu xuízo, é “evidentísimo” que en España “hai desgoberno”.
Sánchez e Zapatero
Finalmente, ante a conxuntura xudicial que rodea ao xefe do Executivo estatal e ao seu entorno, sobre se considera que o propio Pedro Sánchez e o PSOE como persoa xurídica poderían acabar imputados a raíz das investigacións abertas, apurouse en recalcar que “é unha decisión dos xulgados”.
“A min dáme a impresión de que pode chegar a ocorrer, visto todo o que estamos vendo, pero ao final é unha decisión xudicial”, manifestou, antes de reflexionar sobre que chega á percepción de que “hai cousas graves” en vista da “falta de explicacións” e de “defender o indefendible”.
En todo caso, o que ten claro é que, se se dan as imputacións en cuestión, “todos os socios que dixeron que é unha liña vermella a levantarán axiña”. “Atoparán unha explicación e unha excusa. E o PSOE, que tan estupendo se puxo en situacións similares co PP, aquí quitarlle importancia e diría que aquí non pasa nada”, advertiu.
Sobre as últimas palabras públicas do expresidente José Luis Rodríguez Zapatero e se lle cre cando nega tráfico de influencias para o rescate de Plus Ultra, o presidente galego ve “bastante claro” que “houbo tráfico de influencias”. “Xa só falta saber, na miña opinión, en quen influíu”, engadiu.
Tamén considera que “ninguén se cre” as súas achegas sobre as xoias e incidiu en que “pediu unha semana para explicalo, dez días, e xa van dous meses”.
“Se a entrevista (realizada ao expresidente estatal en RTVE) tiña como obxectivo que aínda pensáramos máis claramente que houbo tráfico de influencias e que o das xoias non ten pase, hai que dicirlle ao señor Zapatero que o conseguiu”, rematou, en clave irónica.
