A Xunta apunta á IA e á defensa como palancas clave para o desenvolvemento industrial de Galicia

Nun deses foros especialmente axeitados para pensar o presente e fortalecer o futuro económico de Galicia, como é O Encontro, a Xunta sinalou algúns dos elementos que considera claves para o desenvolvemento industrial da comunidade. Fixoo a directora do Igape, Covadonga Toca, boa coñecedora dos sectores que se están a impulsar desde o Goberno galego e desde a Consellería de Economía.

Toca Carús subliñou que o actual contexto internacional, marcado pola reindustrialización de Europa, a transformación tecnolóxica e a transición enerxética, abre oportunidades para Galicia en ámbitos como a industria da defensa, a descarbonización, a fabricación avanzada ou a intelixencia artificial.

Ese potencial pódese percibir, ao seu xuízo, na boa marcha da industria galega, con unhas exportacións en máximos históricos e un ecosistema innovador en continuo crecemento. A isto súmase o atractivo da comunidade á hora de atraer investimentos, como mostra a chegada do fabricante chinés SAIC a Ferrol e As Pontes.

Estabilidade e innovación

A directora do Igape advertiu que a confianza das empresas depende cada vez máis da estabilidade institucional, da seguridade xurídica e dun acompañamento eficaz por parte da Administración. Neste ámbito, destacou o papel da Oficina Económica de Galicia como ferramenta para facilitar a implantación e o desenvolvemento de investimentos estratéxicos.

Ademais, avanzou que o Goberno galego traballa na Estratexia de Innovación Empresarial de Galicia 2026-2028 para estender a innovación a un maior número de empresas, ao tempo que seguirá impulsando a apertura a novos mercados, facilitando instrumentos financeiros adaptados ás distintas necesidades empresariais e ofrecendo unha Administración próxima, áxil e coordinada durante todas as fases dos proxectos empresariais.

A industria da defensa

Na xornada que se celebra en A Toxa tamén interveu a directora xeral de Estratexia Industrial e Solo Empresarial, Margarita Ardao, na mesa redonda sobre Oportunidades no ámbito da defensa, onde lembrou que esta mesma semana se presentaron no Consello da Xunta os acordos de asociación, unha das principais medidas da Iniciativa Estratéxica de Seguridade, Defensa e Aeroespacial (Iesda). Cun investimento por parte da Administración autonómica de 40 millóns de euros, e mediante a Compra Pública Precomercial, o que se busca é atraer grandes proxectos industriais para desenvolver e fabricar en Galicia novas solucións tecnolóxicas e incorporar, así, máis empresas a estes sectores.

Ardao lembrou, tamén, que esta estratexia recolle outras medidas de apoio como as axudas para tecnoloxías duais (de uso civil e militar), con 6 millóns de euros de orzamento; e para a certificación de empresas que queiran acreditarse como subministradoras para o sector da defensa (1,5 millóns de euros), que recibiu máis de medio cento de solicitudes de compañías dos sectores naval, metalmecánico, aeroespacial, industria das TIC, transporte, automoción ou construción.