Abanca e a patronal galega impulsan unha liña de crédito de 650 millóns para fortalecer ás empresas.

As empresas asociadas á CEG poderán acceder a esta liña de financiamento multidestino en condicións preferentes e con ela preténdese “acompañar as necesidades do segmento e financiar os investimentos necesarios” para abordar os seus principais retos.

Abanca e a Confederación de Empresarios de Galicia (CEG) asinaron un convenio de colaboración co que pretenden dar resposta aos “principais desafíos” de empresas e autónomos galegos mediante “unha liña de crédito extraordinario de ata 650 millóns”.

O novo texto foi asinado esta mañá na sede da CEG en Santiago e participaron o director xeral Comercial de Abanca, Gabriel González Eiroa, e o presidente da CEG, Juan Manuel Vieites. Tras a sinatura, os dous representantes abordaron a actualidade das empresas galegas e acordaron abordar os novos desafíos do colectivo.

As empresas asociadas á CEG poderán acceder a esta liña de financiamento multidestino en condicións preferentes. Esta proposta extraordinaria de crédito pretende acompañar ás necesidades do segmento e financiar os investimentos necesarios para abordar os seus principais retos.

“Abanca é un aliado para as empresas que queren poñer en marcha os seus proxectos, na última década, o 70% das concesións de crédito do banco foron a empresas, cun incremento do 6% fronte ao sector, que reduciu a financiación nun 5%”. “Este acordo coa CEG, sen dúbida, vai axudar a poñer todo o noso coñecemento ao servizo das empresas galegas”, explicou Gabriel González Eiroa, director xeral Comercial de Abanca.

Por súa parte, Juan Manuel Vieites insistiu en que “este convenio é unha excelente oportunidade para as empresas galegas interesadas en adoptar tecnoloxías renovables e eficientes”. “Facilita o acceso ao crédito, permitindo a implementación de proxectos que reducen custos operativos a longo prazo e melloran a sostibilidade ambiental”, engadiu.