Metrovacesa ficha a San José para construír 100 vivendas na Coruña

Metrovacesa adxudicou a San José, o grupo construtor de Jacinto Rey, as obras de execución dun novo edificio residencial no barrio coruñés San Pedro de Visma. O proxecto contará cunha superficie construída de 15.000 metros cadrados e cun cento de vivendas, con terraza, garaxe e trasteiro ademais de zonas comúns con xardín privado, piscina e salón social. 

Así figura nas contas trimestrais remitidas este xoves por San José á Comisión Nacional do Mercado de Valores (CNMV), nas que o grupo construtor tamén informou dun beneficio neto de 12,55 millóns de euros no primeiro trimestre de 2026, un 18,7% máis que no mesmo período do ano anterior; a facturación incrementouse un 13,8%, ata superar os 417 millóns de euros, impulsada pola alza do negocio tanto a nivel nacional, que aumentou un 13,1%. 

“Metrovacesa dáche a benvida a “Residencial Caleida”, no novo barrio de San Pedro de Visma en A Coruña. Un edificio ao carón dun gran parque de máis de 50.000 metros cadrados”, explica a promotora no dossier comercial do proxecto, no que se detalla que o edificio foi deseñado por Álvaro Romero, do estudo ARA Arquitectos. 

A promoción de vivendas atópase situada nun ámbito entre o barrio do Ventorrillo e a rotonda do “Pavo Real” da Rolda de Outeiro da cidade herculina e a uns 2 quilómetros do centro. “Este novo barrio denominado “San Pedro de Visma” cuxa urbanización comezará en 2024, albergará unhas 3.600 vivendas, estará dotado con amplas avenidas con carril bici e un gran parque (90.000 metros cadrados de zonas verdes)”.

Residencial Caleida é un dos tres grandes proxectos que Metrovacesa impulsa en Galicia. Outro deles é o de Torre Aura, edificio de 96 vivendas, de dous a catro dormitorios, con garaxe, trasteiro e terrazas que tamén se levantará en San Pedro de Visma. 

«O edificio foi deseñado para aproveitar a luz natural e ofrecer vistas ao mar e á montaña. As vivendas, con superficies desde 72 metros cadrados, presentan diferentes tamaños e orientacións. O complexo inclúe dúas prazas de garaxe por vivenda e zonas comunitarias con áreas verdes, ximnasio e sala común», explicaba a promotora.

O terceiro dos proxectos é o de Novolérez IV, a cuarta fase dunha promoción situada en Pontevedra xunto ao cauce do río Lérez. Neste caso trátase dun edificio de sete alturas e dous niveis de soto, con 132 vivendas de ata catro dormitorios, todas con praza de garaxe, trasteiro e terraza cuberta agás os áticos, que teñen terrazas descubertas.

Outros proxectos de San José

O grupo San José tamén resultou adxudicatario do Complexo Galicia Sports 360 en Mos do Celta de Vigo. “O Complexo Deportivo Galicia Sports 360, un proxecto moito máis amplo no que se integra a actual Cidade Deportiva Afouteza, tamén realizada por San José”, explica a compañía nas contas trimestrais. 

O lote adxudicado, para a segunda fase de construción, comprende a execución de distintas obras entre as que se inclúe o edificio de categorías inferiores, un edificio de clínica, un edificio de uso mixto, ademais da urbanización, acondicionamento e

paisaxismo de todos eles. A adxudicación supón unha superficie urbanizada de máis de 80.000 metros cadrados e uns 20.000 de superficie construída.