Cume entre o PP e a patronal galega para rebaixar impostos e burocracia.

A sede da Confederación de Empresarios de Galicia (CEG) en Santiago acolleu esta semana unha reunión entre o presidente da institución, Juan Manuel Vieites, e varios deputados e senadores do Partido Popular.

A través dun comunicado, o PP galego subliña que durante este encontro trasladou o seu “compromiso” por “mellorar” as condicións de autónomos e pequenos empresarios co obxectivo de “facer valer o seu esforzo” a través de medidas que lles permitan “dedicarse a traballar e non perder o tempo en loitar contra cada vez máis trabas, impostos e burocracia”.

Na reunión tamén estiveron presentes diferentes representantes da Asociación intersectorial e interterritorial de autónomos e pequenas empresas de Galicia (APE) e da Federación Nacional de Asociacións de Traballadores Autónomos (ATA). Os deputados do PP presentaron o decálogo de propostas que o presidente nacional do partido, Alberto Núñez Feijóo, expuxo co obxectivo de ofrecer aos autónomos “menos impostos e trabas, máis facilidades para crecer e máis protección”.

Estas medidas xiran en torno a varios eixos. Entre eles: a exención do IVA a quen factura menos de 85.000 euros; Tarifa Cero para novos autónomos; redución anual das declaracións; o non pagamento das cotizacións durante un ano polo primeiro empregado contratado; non pagamento das cotizacións polas baixas por enfermidade grave. Tamén inclúe facilidades para traballar despois da idade de xubilación; compatibilidade do traballo autónomo e por conta allea; exención de cotas durante dous anos tras a paternidade e maternidade; equiparación dos dereitos por lactación e clarificación; e incremento das deducións de gastos.

As peticións de Vieites

Neste sentido, o presidente da CEG, Juan Manuel Vieites, asegurou que “consideran urxente dotar ao autónomo dunha verdadeira seguridade xurídica, fiscal e social, eliminando as barreiras que actualmente desincentivan o emprendemento e penalizan o desenvolvemento da actividade económica”.

No caso de Galicia, lembrou que continúa sendo a comunidade con maior número de persoas traballadoras autónomas por cada habitante de entre 16 e 64 anos (127,6), segundo o Ministerio de Traballo e Economía Social. A iso súmase, amplía, un dato recollido no informe GEM 2024-2025: a taxa de actividade emprendedora (TEA) sitúase no 6,5%, a cifra máis alta da última década.

Neste sentido, Vieites subliña que “a pesar do seu liderado, Galicia rexistra unha redución gradual no número de persoas autónomas, motivada principalmente por tres factores: o envellecemento poboacional e a falta de relevo xeracional, a diminución da actividade agrícola e comercial e a elevada mortalidade empresarial nos primeiros anos de vida dos proxectos”.

Por iso, no ámbito económico e fiscal, remarcou que a “prioridade absoluta é aportar certeza”. “Isto require, por exemplo, establecer que a obriga de cotizar nazca unicamente cando os rendementos superen o Salario Mínimo Interprofesional en cómputo anual, evitando así a asfixia de quen inicia unha actividade ou conta con ingresos marxinais”, explicou.

Tamén aludiu á reforma da xubilación, propondo eliminar a obrigatoriedade de esperar un ano para acceder á xubilación activa e facilitar o relevo xeracional permitindo a figura do colaborador non familiar.