Ferroglobe aposta por ampliar a súa maior mina en Galicia en pleno ERTE na súa planta de Sabón

Cara e cruz en Ferroglobe. A matriz de Ferroatlántica iniciou a fase de tramitación para ampliar un 30% a súa maior mina en Galicia (a de Serrabal, entre Vedra e Boqueixón) mentres afronta 16 meses de ERTE na súa planta de Sabón.

O Diario Oficial de Galicia (DOG) recolle na súa edición deste xoves que a súa filial Ferroglobe Ramsa Mining SA someteu a información pública o proxecto de ampliación deste xacemento de cuarzo.

A compañía aposta por elevar de 110 hectáreas a 143 a superficie desta explotación, o que suporía un aumento do 30%. No caso de prosperar a súa iniciativa, Ferroglobe contaría cunha área de 1,43 millóns de metros cadrados.

Segundo avanza Praza, os plans desta compañía que ten ao Grupo Villar Mir como primeiro accionista pasan por ampliar a explotación tanto polo nordeste como polo noroeste co obxectivo de afastarse do trazado da liña do AVE.

A pegada mineira de Ferroatlántica en Galicia

Ferroglobe eleva, deste xeito, a súa aposta polo seu negocio mineiro en Galicia. Ademais da de Serrabal, a matriz de Ferroatlántica tamén controla outras tres: Sonia (Mañón), Esmeralda (Val do Dubra) e Coto Minero Conchitina (O Vicedo).

Entre todas elas achegan case un terzo de todo o cuarzo que Ferroglobe extrae cada ano para nutrir a súa rede de fábricas de ferrosilicio e silicio metálico en todo o mundo.

Ferroglobe, que tamén conta con minas en Sudáfrica, Estados Unidos ou Canadá, sostén desde Galicia o 27% da súa produción de cuarzo e cuarcita en todo o mundo.

Non en balde, foron 277.000 toneladas de mineral as que extraeu das súas catro minas galegas ao longo de 2025, fronte ao millón total. Precisamente Serrabal, con 173.000 toneladas, liderou a produción en Galicia o ano pasado (fronte ás 74.000 de Sonia, as 16.000 de Coto Minero Conchitina e as 14.000 de Esmeralda) e só a de Thaba Chueu Mining, situada en Sudáfrica, achegou máis: 511.000 toneladas.

ERTE en Sabón

A propietaria de Ferroatlántica inicia a fase de tramitación para ampliar o seu negocio mineiro na comunidade nun momento marcado pola crise na súa planta de Sabón. O comité de empresa de Ferroatlántica asinou o pasado mes de xullo o documento definitivo para o expediente de regulación temporal de emprego (ERTE) na factoría arteixá.

A medida afecta a 113 traballadores (a práctica totalidade) por un período de 17 meses (ata decembro de 2027) e desde os sindicatos denunciaban que «as causas organizativas e produtivas alegadas pola dirección -derivadas da caída de prezos do silicio metálico e da competencia desleal das importacións da República Popular China sen aranceis na Unión Europea– non deberían ser costeadas pola plantilla».

Os representantes dos traballadores defenderon que a sinatura do ERTE era un acto de “responsabilidade para cos 113 traballadores afectados, co único obxectivo de blindar as máximas garantías económicas posibles ante un escenario de suspensións que a empresa ía aplicar de todos os xeitos”.

Neste sentido, desde o comité advertían que se manterían “vixilantes durante os 17 meses de vixencia do expediente e que esixirán a desafectación inmediata da plantilla no momento en que se recupere a mínima actividade produtiva nas instalacións».