Inditex brilla na Super Bowl: Zara viste a Bad Bunny nun espectáculo que irrita a Trump
Comentarios
Bad Bunny converteuse en tendencia mundial despois do seu espectáculo no descanso da Super Bowl 2026, que Donald Trump cualificou como “unha afronta á grandeza dos Estados Unidos”. O artista portorriqueño encabezou o show de medio tempo cun número integramente en español, no que tamén luciu unha empresa galega. Bad Bunny presentouse cun traxe completo de Zara integrado por camisa, corbata, pantalóns chinos, camiseta deportiva co número 64.
O cantante fuxiu das firmas de luxo, moi presentes neste tipo de espectáculos, e apostou pola liña da multinacional fundada por Amancio Ortega. Segundo avanzan distintos medios Bad Bunny tivo un detalle cos traballadores de Zara en A Coruña enviándolles unha mensaxe en agradecemento ao seu traballo para que fose posible o show no Levi’s Stadium de Santa Clara (California).
“Grazas polo tempo, o talento e o corazón que puxeron. Grazas por facelo real. Este show tamén foi de vós. Espero que o disfruten. Vémonos pronto!”.
Unha das pezas máis comentadas foi precisamente a camiseta na que se podía ler xunto a ese número 64 ‘Ocasio’, parte do seu nome Benito Antonio Martínez Ocasio. Respecto ao número especulouse bastante nas últimas horas. Desde que podía ser unha referencia ao ano de nacemento da súa nai ata que se trata dun aceno ao seu álbum de 2020 ‘El Último Tour del Mundo’, o primeiro -en español- en 64 anos en encabezar a lista Billboard 200 de todos os xéneros.
Con todo, a revista Complex Magazine informou que o 64 débese a unha referencia a un familiar do cantante: o seu tío falecido ao que quixo render homenaxe lucindo o número que utilizaba na súa equipación durante os seus anos como xogador de fútbol americano.
O enfado de Donald Trump
Durante semanas unha parte importante da administración de Donald Trump así como seguidores do seu movemento MAGA (Make American Great Again) estiveron facendo un chamamento para que os estadounidenses non visen a actuación de Bad Bunny. De feito, o presidente estadounidense promocionara un espectáculo alternativo protagonizado por Kid Rock, amigo persoal de Trump.
Tras finalizar o número Trump escribiu na súa rede social Truth: “¡O espectáculo do medio tempo do Super Bowl é absolutamente terrible, un dos peores da historia!”
“Non ten sentido, é unha afronta á grandeza dos Estados Unidos e non representa os nosos estándares de éxito, creatividade nin excelencia. Ninguén entende nin unha palabra do que di este tipo, e o baile é repugnante, especialmente para os nenos pequenos que o ven en todo Estados Unidos e no resto do mundo”, continuou no seu mensaxe Trump, que cualificou a actuación como unha “bofetada” ao país.
