A directora xeral de Unirisco, galardoada nos Premios Entalpía na categoría ‘transferencia tecnolóxica’
Os Premios Entalpía buscan recoñecer e poñer en valor o traballo das persoas que impulsan o talento e a innovación no ecosistema startup nacional.
Inmaculada Rodríguez, directora xeral de Unirisco, recollendo o galardón. Imaxe: Cristina Correa.
Comentarios
A directora xeral de Unirisco, Inmaculada Rodríguez Cuervo, foi galardoada na categoría de “transferencia tecnolóxica” na segunda edición dos Premios Entalpía, un evento no que os distintos actores do ecosistema de startups nacional e impulsores da innovación tecnolóxica foron os protagonistas.
O acto, celebrado no Ateneo de Madrid e ao que acudiron máis de 250 asistentes, foi presentado por Claudia Múgica, fundadora dos premios, quen destacou a “responsabilidade de apostar por aqueles emprendedores que están dispostos a construír o mellor futuro imaxinable”.
Inmaculada Rodríguez recibiu o galardón –unha escultura do artista vasco Borja Jiménez– das mans de Claudia Múgica e en nome de Iker Marcaide e Margarita Albors. Os outros gañadores foron: Francisco de la Torre, alcalde de Málaga, na categoría “administración pública”; Jordi Romero, CEO de Factorial, e Bernat Farrero, CEO de Itnig, en “divulgación”; Carlos Aso, CEO de Andbank, en “empresa corporativa”; Marta Nogueras, directora xeral de Lanzadera; en “incubadora”; Carlos Cosculluela, director na Fundación Damián Rodríguez Olivares, en “institución académica”; e Carmen Pumariño, directora de investimentos en Zubi Capital e presidenta de Startup Galicia, na categoría “investimento”
Pola súa banda, o Premio Honorífico Entalpía 2026 foi outorgado a Jaime Carvajal y Urquijo. Cofundador e primeiro presidente da Fundación Endeavor España, sendo actualmente o seu Presidente de Honra, durante as súas palabras de agradecemento polo premio puxo en valor o traballo de Endeavor España para contribuír ao ecosistema de emprendemento.
Sobre o emprendemento Carvajal destacou que “é un mundo para xente valente, disposta a asumir riscos e tamén é un mundo no que destaca a xenerosidade e a disposición a axudar a outros emprendedores.”
Os Premios Entalpía buscan recoñecer e poñer en valor o traballo das persoas que impulsan o talento e a innovación no ecosistema startup nacional. Os nominados foron seleccionados por un xurado de emprendedores de éxito.
