Batea Oncology, impulsada por Unirisco e Xesgalicia, consegue 2,5 millóns este ano para o seu tratamento do glioblastoma.
A 'startup', constituída en 2024, desenvolve un dispositivo médico para o tratamento de glioblastoma, o tumor cerebral máis frecuente e agresivo, que necesita novas solucións terapéuticas.
Inmaculada Rodríguez, directora de Unirisco, xunto ao equipo de Batea Oncology
Comentarios
Batea Oncology, empresa constituída en 2024 especializada na investigación e desenvolvemento de novas tecnoloxías para o tratamento de enfermidades oncolóxicas, pecha o ano alcanzando os 2,5 millóns de financiamento para impulsar o seu GlioHooK, dispositivo médico para o tratamento de glioblastoma, o tumor cerebral máis frecuente e agresivo, que precisa novas solucións terapéuticas.
Xesgalicia e Unirisco desembarcaron o pasado setembro na empresa, que traballa en colaboración co Hospital Clínico Universitario de Santiago e o Instituto de Investigación Sanitaria de Santiago. O seu dispositivo GlioHook implántase no momento da cirurxía, capturando as células tumorais residuais, responsables das recaídas, e facéndoas máis sensibles ao tratamento habitual de radioterapia. “O obxectivo de Batea Oncology é cambiar o paradigma de tratamento e resposta destes pacientes, para o que esperamos iniciar un ensaio clínico piloto con pacientes en 2026”, explican desde a compañía.
Para impulsar o desenvolvemento clínico do seu dispositivo a compañía pechou este 2025 unha primeira rolda de financiamento de 750.000 euros, na que entraron no accionariado Unirisco e XesGalicia, así como un nutrido grupo de bussiness angels a través da plataforma Capital Cell.
En paralelo, a empresa conseguiu levantar fondos non dilutivos –cos que se obtén financiamento sen ceder parte do control da empresa– de varios programas competitivos a nivel nacional e europeo.
En particular, conseguiu un proxecto na convocatoria de Colaboración Público-Privada da Agencia Estatal de Investigación, dotado con 1,33 millóns en colaboración cos tres hospitais cos que levará a cabo o primeiro ensaio clínico con GlioHook: o Hospital Universitario Vall d’Hebron, o Hospital Universitario HM Sanchinarro e o Hospital Clínico Universitario de Santiago de Compostela. Ademais, Batea Oncology foi seleccionada na convocatoria 2025 do programa Neotec do CDTI e no programa europeo Women Tech EU.
O tratamento de glioblastoma non cambiou nos últimos 20 anos, desde que en 2005 se estableceu o tratamento actual, que consiste en cirurxía seguida de quimio e radioterapia. Con todo, os pacientes teñen moi mal prognóstico, cunha esperanza de vida media de 15 meses desde o diagnóstico. “A pesar de que se investigou moito en novas terapias, ningunha chegou de maneira eficiente á clínica, en parte pola dificultade de atravesar a barreira hematoencefálica. O noso dispositivo GlioHook ofrece varias vantaxes competitivas que o posicionan como unha alternativa real xa que ademais de favorecer a focalización da enfermidade e potenciar o efecto da radioterapia intégrase facilmente na práctica clínica habitual, cubrindo o gap terapéutico entre a cirurxía e o inicio da radioterapia”, sinalan desde a firma.
