González Laxe: “Debemos seguir apostando pola modernización económica, institucional e social de Galicia”
O catedrático e expresidente da Xunta fai un chamamento á concordia e a actuar "contra a polarización extrema e contra aqueles que alentan a crispación"
Fernando González Laxe, na cerimonia de entrega do galardón da 67 edición dos Premios Fernández Latorre. Foto: Fundación Santiago Rey Fernández-Latorre
Comentarios
“É ben sabido que os retos que afronta Galicia son máis abordables mediante unha maior colaboración mutua, que traballando cada un por si só. Así, por exemplo, sabemos que debemos seguir apostando pola modernización económica, institucional e social de Galicia”. Son as palabras de Fernando González Laxe, Catedrático de Economía Aplicada e expresidente da Xunta, durante o seu discurso tras recibir este xoves o galardón na 67 edición dos Premios Fernández Latorre.
González Laxe fixo un chamamento á concordia e formulou unha reivindicación: “Actuar contra a polarización extrema, contra aqueles que alentan a crispación e contra os que poñen obstáculos permanentes e obstrúen o traballo común, e a favor do acordo, do consenso, das normas establecidas e da lealdade institucional”.
O expresidente da Xunta enumerou sete retos que a comunidade debe abordar cun “maior nivel de colaboración mutua”: a modernización económica e institucional, a defensa dun corredor de transportes con conectividade nacional e internacional, o impulso ás tecnoloxías avanzadas, a defensa do patrimonio histórico e os legados culturais, a defensa da biodiversidade, o problema da vivenda e uns servizos públicos universais, gratuítos e eficientes.
González Laxe insistiu na importancia do diálogo e a vontade de entendemento con dúas recomendacións. Por un lado, a de relegar as discordias a un segundo plano e, por outro, a de abandonar o concepto de “canto peor, mellor”.
Tamén tivo palabras o expresidente da Xunta para analizar os desafíos que afronta na actualidade un mundo que pasou “de globalizado a fracturado por bloques económicos” e dunha “economía moi aberta e con poucas restricións a unha nova situación onde prevalece o proteccionismo” no que emerxen “autarcas con trazos ditatoriais” á fronte dos principais gobernos.
“Como dixo un bo amigo, son un deses expresidentes que non son xarróns chineses; porque, ao estar feitos de pizarra de Sargadelos, pódense usar a diario”, concluíu.
