Oitava xornada de paros no transporte de viaxeiros na Coruña coa ameaza de folga indefinida no horizonte.

Nova xornada de paros no sector do transporte por estrada de viaxeiros na provincia da Coruña. Trátase do oitavo día de folga e contou con amplo seguimento e con escaso número de autocares realizando a ruta. Ademais, as principais organizacións sindicais convocaron concentracións diante da Dirección Xeral de Mobilidade, na Coruña; en Santiago de Compostela, nas cocheras de Monbús na rúa de Amio e en Ferrol, diante do edificio administrativo da Xunta.

“Igual que nas anteriores xornadas”, sinalou a Europa Press Ernesto Rei, de CIG-Transportes, ao incidir nun paro que os sindicatos cualifican de “total”.

Nesta liña, Ernesto Rei tamén asegurou que a única novidade é que por parte da representación social pediron a mediación e que a patronal condicionou a súa aceptación da mesma “a que se suspenda a folga”. “Non o imos aceptar”, asegurou Rei á espera, con todo, de se durante a xornada se producen avances, unha cuestión que delegou no papel do “mediador”, en alusión ao Consello Galego de Relacións Laborais.

Pola súa parte, nas estacións de autobuses hai piquetes e tamén efectivos policiais, cun panorama de estacións baleiras e sen autobuses, coa excepción puntual de chegada de algúns deles, pero moi poucos, precisaron fontes consultadas respecto á situación na provincia.

Ameaza de folga indefinida

Os paros foron convocados polos sindicatos CCOO, UGT e CIG, con novas xornadas para os días 20 e 23 de xaneiro e posible convocatoria de folga indefinida a partir do 2 de febreiro.

Os sindicatos denuncian o “inmobilismo” da patronal de cara á negociación do novo convenio, no que esta parte demanda melloras salariais e laborais. Neste sentido, inciden en que o principal motivo é a existencia dun convenio “desfasado” e “paralizado” desde hai catro anos.