Avícola Tratante, provedor de Froiz, pasa a mans do xigante Hevo Group.
Hevo Group, empresa que supera os 150 millóns de euros de facturación, pechou a compra da histórica empresa con base de operacións en Dozón.
Imaxe das instalacións de Avícola Tratante / Avícola Tratante
Comentarios
Avícola Tratante cambia de mans. Hevo Group, o segundo maior produtor de ovos de toda España (das súas instalacións saen 80 millóns de ducias anuais), adquiriu á histórica empresa con base de operacións en Dozón.
Mediante este movemento, Hevo Group engorda a súa lista de compras neste 2025. E é que, ademais de Avícola Tratante, a compañía xa tomou o control previamente de Granxa Legaria e de El Granjero, unhas operacións ás que se suman as inversións para a ampliación e modernización das súas instalacións produtivas.
A través destes movementos, Hevo Group grupo reforza a súa presenza en todo o territorio nacional. As instalacións na provincia de Pontevedra súmanse aos centros en Guadalajara, Cuenca, Tarragona, Navarra e Vizcaya.
Hevo Group, un xigante que factura máis de 150 millóns de euros, toma, desta maneira, as rendas de Avícola Tratante, un dos provedores de referencia de cadeas de supermercados como Froiz. A firma foi fundada no ano 1969 por José Raúl Vázquez Diéguez, que faleceu o pasado mes de outubro.
O seu sobriño, Alejandro Campos, asumiu o mando da empresa tras a súa xubilación e impulsou un proceso de expansión que lle valeu para obter o selo Galicia Calidade e para atraer o interese de xigantes do sector como Hevo Group.
