Puig seduce a Estée Lauder con Lonia como participada máis valiosa e os millonarios royalties de Carolina Herrera

As familias Puig e Lauder negocian estes días fusionar os seus respectivos imperios cosméticos para crear un xigante que rondaría os 20.000 millóns de cifra de negocio conxunta. Unha operación que se mira con lupa por parte de analistas e investidores e que tamén se segue con interese na clase empresarial galega. Non é para menos, xa que os perfumistas cataláns posúen, a través de Puig Brands, un 25% de Textil Lonia, a compañía dos irmáns Domínguez que explota as marcas Carolina Herrera e Purificación García e que en 2024 se fixo coa histórica enseña Christian Lacroix. A dúbida nestes momentos está en como se articulará a operación, se fructifica e se a mesma se levará a cabo mediante unha opa do grupo estadounidense cunha contraprestación entre accións e efectivo.

Puig pechou o seu exercicio 2025 cun beneficio neto axustado de 587 millóns de euros, un 6,5% máis, e con uns ingresos netos de 5.042 millóns de euros, un 7,8% por riba do exercicio precedente. O seu principal negocio é o das fragancias, que aglutina o 72% da facturación. Non obstante, a compañía tamén posúe unha serie de joint ventures con distintas empresas, sendo Lonia a súa participada máis valiosa.

Lonia, Isdin e Granados

A familia catalana desembarcou en Lonia no ano 2014, cando se fixo cun 25% da compañía, naquela altura en mans do grupo de luxo francés LVMH por uns 125 millóns, segundo a prensa da época. Xa mantía relacións co grupo dos irmáns Josefina, Jesús e Javier Domínguez, xa que en 2000 Carolina Herrera asinou cos ourensáns a licenza para a produción e distribución da liña lifestyle CH Carolina Herrera.

Segundo a última memoria de Puig remitida á CNMV, o 25% de Lonia constitúe a súa participación máis valiosa. Ese porcentaxe (o outro 75% reparte entre os irmáns fundadores da compañía a partes iguais) ten, segundo a perfumista, un valor neto contable de 153,4 millóns de euros, polo que a firma de moda é valorada, no seu conxunto, en 612 millóns de euros.

Tamén posúe Puig un 50% de Isdin, farmacéutica na que comparte capital coa familia Esteve. Ao seu paquete accionarial asigna un valor neto contable de 141,6 millóns, considerando por tanto que o 100% ascende a 284 millóns.

A terceira gran participada é a firma brasileira de produtos cosméticos de alta gama Granados. Valora o seu 35% no capital da mesma en 118 millóns de euros.

Beneficios e dividendos

As tres finalizaron 2025 en beneficios e outorgando dividendos. Na súa memoria anual, Puig indica que Lonia finalizou o mes de decembro con uns activos de 458 millóns de euros e un pasivo total que se reduciu dos 138 aos 92,3 millóns. Segundo expón o grupo catalán na súa memoria remitida ao supervisor bursátil, a compañía de moda pechou o ano natural cun resultado de 35,7 millóns, menos dun 5% por debaixo dos 37,3 millóns que lle outorgaba a finais de 2024.

Hai que ter en conta que Puig pecha o seu exercicio fiscal en decembro e Lonia non o fai ata febreiro, polo que estas cifras non coinciden, aínda que se achegan, ás que posteriormente a compañía téxtil ofrece na súa propia memoria anual.

O pasado exercicio, Isdin pechou decembro cun resultado de 56,6 millóns, fronte aos 66 de 2024, mentres que Granados tería gañado, sempre segundo os datos de Puig, 41,3 millóns, tamén por debaixo dos 54 anotados o ano precedente.

Tanto de Lonia como do resto das súas grandes participadas, Puig obtén dividendos como accionista. De Isdin tería recibido en 2025 a cantidade de 13,7 millóns, mentres que de Lonia se tería embolsado 6 millóns de euros. A retribución aos socios da compañía carioca lle reportou outros 4,2 millóns.

Ingresos por royalties

Ademais dos dividendos e dos beneficios que contabiliza na súa conta de resultados por método de equivalencia, Puig contabilizou en 2025 unha cantidade de 32,2 millóns procedentes de “vendas e outros ingresos” procedentes de empresas relacionadas. Así, explican os seus administradores que “as transaccións con empresas asociadas correspóndense principalmente cos pagos recibidos polos servizos de fabricación que Puig Brand proporciona a Isdin e os royalties que Puig recibe de Sociedade Téxtil Lonia en relación coa licenza de CH Carolina Herrera”.

A de Lonia non é a única relación co empresariado galego de Puig. A compañía tamén retén unha participación dun 14,8% en Adolfo Domínguez (o modisto fundador é irmán dos donos de Lonia). Os perfumistas cataláns retén esa participación a través de Exea Quorum, unha das sociedades holding da familia que controla a empresa Puig Brands.

Adolfo Domínguez

Ademais da participación, Puig posúe a licenza global exclusiva da liña de fragancias Adolfo Domínguez desde o ano 2000, sendo a súa colonia máis coñecida a de Auga Fresca de Rosas.

A compañía capitaneada por Adriana Domínguez recibiu no seu exercicio 2024, último do que hai datos oficiais, case 1,4 millóns de euros en concepto de pago por “cesión de marca”. Estes ingresos, explica na súa memoria anual, “derivan, principalmente, das vendas de produtos de perfumería realizadas por Puig, actual accionistas, baixo a denominación comercial Adolfo Domínguez”. En decembro de 2023, ambas compañías renovaron o seu contrato de cesión de marca por un período de 10 anos.

Habrá que ver como finalmente se articula a integración dos negocios da familia Lauder e Puig, se esta finalmente sae adiante, e como quedarán no novo escenario as participacións da firma catalana.