Tino Fernández e Josefa Ortega aceleran: Altia dispara un 36% os beneficios e gaña máis de 20 millóns

Altia superou no pasado exercicio as previsións do seu propio plan de negocio en todas as magnitudes relevantes agás algúns márxes que foron máis estreitos do estimado. A pesar diso, os beneficios, o ebitda e os ingresos do grupo de Tino Fernández, expresidente do Deportivo, disparáronse máis alá do escenario que debuxaba a folla de ruta da consultora tecnolóxica, cunha capitalización bursátil no BME Growth de 475 millóns.

A compañía coruñesa, que ten como terceira accionista a Josefa Ortega, a irmá do fundador de Inditex, rematou 2025 cunha cifra de negocio de 315,3 millóns, o que supón un incremento do 23,3% respecto ao exercicio anterior. O ebitda elevouse un 24,3%, ata acadar os 31,1 millóns, mentres que o beneficio neto superou por primeira vez na traxectoria do grupo os 20 millóns. Concretamente, Altia logrou unhas ganancias de 21,1 millóns, un 36,5% máis en comparación cos 15,4 millóns de 2024.

O plan de negocio presentado por Altia estimaba uns 300 millóns de ingresos en 2025, 30,4 millóns de ebitda e 19,6 millóns de beneficio. Os resultados, que son aínda provisionais, superaron as previsións. No caso dos márxes a comparativa é dispar. O de ebitda foi dun 9,9% (0,1 puntos máis) cando se esperaba un 10,1%; e o marxe neto situouse no 6,7% (0,7 puntos máis) superando unhas previsións que apuntaban ao 6,5%.

Nun comunicado remitido ao mercado, a compañía explica que estas cifras foron formuladas polo consello de administración celebrado este xoves a partir de información aínda non auditada procedente da contabilidade da sociedade. “Por tanto, aínda que se considera que a definitiva non diferirá, a información que se presenta debe considerarse como provisional, suxeita a posibles cambios”, matizan.