Capsa, Puleva e Danone, condenadas a indemnizar a gandeiros galegos polo cártel do leite

A Audiencia Provincial de Barcelona estimou parcialmente o recurso presentado por un grupo de gandeiros para reclamar unha indemnización ao cártel lácteo polos teóricos menores prezos que percibiron polo leite en orixe durante o período no que operaron as prácticas colusorias, segundo estableceu a CNMC, entre o ano 2000 e o 2013. A resolución, que corríxe unha sentenza desestimatoria do Xulgado do Mercantil número 11, establece unha compensación do 2%, ao entender que ese sería o “infraprecio” que recibiron as granxas polo seu produto debido aos intercambios de información entre as empresas do cártel, ao que engade os xuros de demora. Non fai un cálculo da compensación total, pois deixa esta cuestión para a execución de sentenza.

A demanda, neste caso, diríxese contra Capsa, o brazo industrial de Central Lechera Asturiana e dona de Larsa; a antiga Puleva Food (agora Industrias Lácteas de Granada), a fábrica de Granada de Lactalis; e Danone. Competencia sancionou en 2019 a estes grupos, tres dos actores máis relevantes no mercado español, con 52 millóns de multa: 21,8 millóns a Capsa; 10,2 millóns a Puleva; e 20,2 millóns a Danone. Todas estas multas están recorridas en casación (no caso de Capsa pola Avogacía do Estado debido a que a Audiencia Nacional rebaixou a sanción) e á espera do que dite o Tribunal Supremo.

A Audiencia Provincial considera que non é necesaria a firmeza para atender a reclamación, pois entende que “os feitos declarados probados pola CNMC e, en definitiva, a existencia das condutas anticompetitivas, confirmáronse na xurisdición contencioso administrativa” e que “os recursos polas sancionadas na súa maior parte foron desestimados e, respecto dos pendentes, a controversia circunscríbese exclusivamente a cuestións relativas á sanción e á prescrición”.

Entre os denunciantes hai gandeiros, sociedades agrarias de transformación, granxas familiares e cooperativas de distintos territorios de España, entre eles, productores de A Mariña, polo que é a segunda sentenza coñecida en apenas tres meses na que se recoñecen indemnizacións para gandeiros galegos polo cártel lácteo. O pasado 16 de outubro, o Xulgado do Mercantil número 14 de Madr