Frinsa, o rei da marca branca, acariña o ‘sorpasso’ a Jealsa como maior conserveira galega

Frinsa, a conserveira da familia Carregal, mira aos ollos a Jealsa e Nauterra (a antiga Calvo), que foron tradicionalmente os dous maiores grupos do sector en España. Á compañía de Carballo superouna xa nun par de exercicios por cifra de negocio, e o pasado 2024 quedouse moi preto dos ingresos de Jealsa, concretamente, a unha diferenza de só 40 millóns. A conserveira de Ribeira alcanzou os 741 millóns, cun crecemento do 4% no exercicio, mentres que o grupo que o grupo que dirixe Jesús Alonso, gran provedor de Mercadona, alcanzou os 781 millóns.

Aínda que conta con marcas propias como Minerva ou Ribeira, Frinsa é sobre todo coñecida como produtora para marca branca de cadeas de distribución, como Lidl, Carrefour, Alcampo ou DIA. A empresa fundada por Ramiro Carregal construíu a súa expansión na última década mediante a constitución dunha rede de filiais comerciais no exterior e coa adquisición da conserveira lusa A Poveira, con planta en Póvoa de Varzim. Agora prosegue co seu crecemento cunha nova plataforma loxística en Salvaterra de Miño tras cancelar o proxecto para levantar unha nova planta en Estados Unidos.

Todo este proceso está a desenvolvelo cunha rechamante rendibilidade. Frinsa gaña máis diñeiro que os seus pares e faio en todos os mercados onde opera.

O beneficio crece un 30%

A compañía, que ten como administrador único a Jorge Carregal, fillo do fundador, pechou 2024 cun resultado de explotación de 55,3 millóns, 14 millóns por encima do exercicio precedente; o ebitda superou os 77 millóns e os beneficios eleváronse un 30%, alcanzando os 39,1 millóns. O Estado de Información Non Financeira (EINF) do grupo mostra as ganancias antes de impostos identificados por mercados, e en todas as prazas os números son positivos. Destacan os beneficios de máis de 40 millóns en España, de 5,7 millóns en Portugal, de máis de 5 millóns en Singapura, onde estableceu o seu central de compras; e de 1,6 millóns de Italia. O BAI global ascendeu a 52,4 millóns.

Frinsa, cunha forte identificación con Ribeira, é, en realidade, unha empresa moi internacionalizada. Más da metade da súa cifra de negocio está fóra da Península Ibérica. O ano pasado facturou 314 millóns en España e Portugal, 320,4 millóns no resto de Europa, e 106 millóns noutros países. Os mercados internacionais, de feito, creceron en ingresos, a diferenza do que sucedeu no mercado ibérico, onde alcanzara os 321 millóns de cifra de negocio en 2023.

Explica Frinsa no seu EINF que é o sétimo maior comprador de atún do mundo ao procesar 160.000 toneladas anuais. O persoal do grupo ascendía a 1.300 traballadores a peche do exercicio.

O dividendo estable de Frinsa

Frinsa tomou por costume repartir ao redor de 22 millóns de dividendo ao ano a conta dos beneficios xerados, que van parar aos dous accionistas do grupo, Ramiro Carregal Rey e o seu fillo Jorge Carregal Varela. O 2024 non é unha excepción. A proposta de aplicación do resultado destina 8,4 millóns a reservas e 22 millóns a retribuír á familia, que xa foron integramente abonados: 2 millóns en xaneiro de 2024, 10 millóns en xuño do ano pasado e 10 millóns en xaneiro de 2025.

En cinco anos, entre 2020 e 2024, Frinsa entregou máis de 100 millóns en dividendos: 12 millóns en 2020, 32 millóns en 2021, 22 millóns en 2022, 12 millóns en 2023, e 22 millóns en 2024.