Inditex ficha para Bruxelas ao lobbista de Decathlon, Levi Strauss e Primark

Inditex multiplícase en Bruxelas. A multinacional con sede en Arteixo contratou en 2025 un segundo intermediario nas súas relacións coa Unión Europea, tal e como se desprende das últimas anotacións do Rexistro de Transparencia da UE.

En concreto, Inditex recorreu aos servizos de 2B Policy para levar a cabo esta actividade como lobby (grupo de interese) ante instancias comunitarias. A matriz de Zara suma así unha segunda firma para realizar estas actividades que nos últimos anos asignara en exclusiva a FTI Consulting Belgium.

De acordo cos datos do Rexistro de Transparencia da UE, Inditex abonou entre 300.000 e 400.000 euros a FTI Consulting Belgium ao longo de 2024 e nos próximos meses está previsto que desglose as cantidades cobradas tanto por esta entidade como por 2B Policy no recentemente finalizado 2025.

Da man de Adidas, Decathlon ou Primark

Con esta particular fichaxe, Inditex segue os pasos doutros xigantes do sector que apostaron por contratar a 2B Policy. Con base de operacións en Ámsterdam, a consultora está especializada en asuntos públicos, relacións institucionais e estratexia regulatoria. “Estamos nunha misión para pechar a fenda entre o dinámico ecosistema lexislativo e a realidade da industria, equipando ás organizacións non só para o cumprimento senón tamén para formar parte do cambio”, subliña a firma na súa páxina web.

Esta empresa de asuntos públicos tivo un único cliente en 2024. Trátase da organización sen ánimo de lucro Cascale, que conta con 300 asociados e que ten como obxectivo a promoción da sustentabilidade na industria téxtil. A entidade creou o denominado Higg Index, que achega unha metodoloxía e un conxunto de ferramentas que permiten medir o impacto ambiental e social de produtos e procesos na industria do vestido e o calzado, ofrecendo así un particular termómetro sobre a aposta pola sustentabilidade.

Ademais de Cascale, que se mantivo, 2B Policy sumou 15 novos clientes ao longo de 2025. Trátase de Alliance for European Flax-Linen & Hemp, Bestseller A/S, Deichmann, Decathlon, a Foundation for Environmental Education, a Fédération de la Haute Couture et de la Mode, Levi Strauss & Co, Primark, Refashion, T2T Alliance, VF Europe, W L Gore & Associates, Adidas e Ecoinvent Association.

Deste xeito, Inditex conta agora cun segundo apoio en Bruxelas, ao igual que Decathlon, que tamén ten contratado a Kreab, ou Primark, que fai o propio con Penta. O grupo con base de operacións en Arteixo tamén figura como cliente do xigante FTI Consulting Belgium, que traballa para outras 81 empresas. Entre elas emerxen nomes propios como Amazon, Bank of America, General Motors, Google, Nvidia, Pfizer, Samsung ou Tik Tok.

Relevo en Inditex

A contratación dunha segunda consultora para esta actividade lobbista en Bruxelas tivo lugar nun 2025 no que Inditex rexistrou un relevo na persoa encargada das relacións coa UE. Este cargo recae agora en Santiago Martínez Lage, que desde finais do ano exerce como director de Asuntos Públicos, Institucionais e Regulatorios.

Martínez Lage relevou no cargo a Iria Mouzo, que puxo punto final a unha etapa de case 20 anos en Inditex para converterse na nova directora de Asuntos Públicos Corporativos do xigante polaco low cost Pepco co obxectivo de construír unha “sólida rede” de operacións en Europa.

O Rexistro de Transparencia da UE tamén dá conta dun brusco descenso no número de reunións de membros de Inditex con representantes da Comisión Europea. Tras manter un total de oito encontros ao longo de 2024, o ano pasado, pola contra, a firma rexistrou só dous.

Ambos foron con Charlotte Merlier, membro do gabinete do comisario europeo de Comercio, Maroš Šefčovič, e tiveron lugar en xullo e novembro. A primeira foi un “diálogo sobre a implementación da lexislación aduaneira” e as “normas de orixe” mentres que a segunda xirou en torno á “reforma da Unión Aduaneira” e o “comercio electrónico”.

Por outra banda, as últimas reunións no Parlamento Europeo cos eurodeputados José Cepeda e Rosa Serrano (ambos do PSOE) datan de setembro de 2024.