O absentismo entre os grandes da moda: aumento “moderado” en Inditex e Mango e en descenso en H&M e Puig

• RBC valora Inditex en case 200.000 millóns e recomenda mercar aproveitando a crise de Ormuz
• Traballo dá o visto bo ao convenio de ARTE, a patronal de Inditex e Mango, tras a impugnación de UGT

En pleno debate en España, cunha campaña da patronal para evitar “as consecuencias das baixas inxustificadas” apoiada polo PP de Alberto Núñez Feixoo e que foi respondida con acusacións de “criminalización” aos traballadores por parte do Goberno e sindicatos, un recente informe de Adecco asegura que o absentismo laboral alcanzou en España o seu máximo histórico en 2025, ao situarse no 7,6% das horas pactadas o que, segundo os seus cálculos, xerou un custo récord de 59.109 millóns de euros para a economía estatal, un 11,7% máis que o ano anterior debido, principalmente, ao repunte das incapacidades temporais. Os datos comunicados polas grandes compañías da moda en España amosan datos desiguais sobre as horas de absentismo, desde os aumentos “moderados” dos xigantes Inditex e Mango o pasado ano, ás reducións do grupo perfumista Puig ou de H&M nas súas tendas no país. O que si é común é que as súas taxas se atopan, por norma xeral, por debaixo desa media estatal a pesar de que o colectivo de dependentes de tenda e almacéns é un dos máis afectados polas incapacidades temporais segundo os datos do grupo de traballo temporal.

Á hora de analizar o absentismo no sector da moda hai que diferenciar entre os datos relativos aos traballadores da “industria téxtil”, máis baixos que noutros sectores, e os dos dependentes comerciais. Segundo o citado informe de Adecco os empregados de tenda e almacéns atópanse entre as dez ocupacións con máis partes de baixa no primeiro trimestre deste ano. Por contra, outro recente estudo, neste caso de Randstad, sitúa a industria téxtil dentro do top ten de sectores con maior redución interanual de absentismo por IT, é dicir, por incapacidade temporal, ao pasar do 5,9 ao 5,4%.

Recentemente, Ana López, a presidenta de ARTE, a patronal de Mango e Inditex, indicaba que o absentismo laboral é un “desafío de país” que impacta especialmente no sector do retail e que “representa entre o 2 e o 5% da masa salarial”. Aseguraba que co novo convenio, que acaba de recibir o visto e prace do Ministerio de Traballo –a pesar da oposición de centrais como UGT e CIG– “imos ver que cousas se poden facer para mellorar o absentismo, que ademais é un fenómeno que impacta nos traballadores que o sofren como tamén nos seus compañeiros e nas empresas, que teñen problemas de organización e uns custos económicos”. A directiva indicou que para abordar a situación é “moi importante contemplar a saúde laboral, os factores psicosociais así como os tipos de liderado dentro das compañías”.

Inditex

Pero, ¿Cales son os números ao respecto dos xigantes da moda? Inditex non aporta na súa memoria a taxa de absentismo, que se calcula tendo en conta o total de horas de ausencia entre o total de horas teóricas pactadas de traballo, aínda que si publica o dato de horas totais de absentismo por enfermidade común. No exercicio 2025, o número total de horas ascendeu a 12,9 millóns de horas, fronte aos 12,48 millóns de horas do exercicio anterior e os 176,54 millóns de horas traballadas.

A cifra pode parecer abismal comparada con outras empresas do sector pero para valorala hai que ter en conta as magnitudes do xigante de Amancio Ortega, que pechou o pasado exercicio con 163.047 persoas na plantilla e con presenza en 214 mercados en todo o mundo. É dicir, aínda que o cálculo non se corresponde coa taxa de absentismo, de media, cada traballador pasaría unhas 70 horas ao ano de baixa por incapacidade temporal. Así, o número de horas de absentismo por enfermidade común incrementouse un 4,2% nun ano.

Aínda que Inditex non aporta o número total de horas contratadas á súa multitudinaria plantilla, tendo en conta o número de horas non traballadas e as desempeñadas, a súa taxa de absentismo podería rondar o 6,8%.

Mango

Mango, a segunda gran téxtil española tras a multinacional de Marta Ortega, si aporta nas súas contas a taxa de absentismo por enfermidade común, que sitúa nun 4,6% fronte ao 4,2% que presenta a finais do exercicio 2024, tamén por debaixo da taxa media en España do 7,6%. O número total de horas pasou de algo máis dun millón a 1,2 millóns. Tendo en conta o número de empregados, máis de 18.000 ao peche de 2025, a media de horas de absentismo por traballador situaríase en 68,5.

Apuntan os administradores da compañía na súa última memoria remitida ao Rexistro Mercantil que o absentismo “rexistra un incremento moderado, situándose no 5% en 2025 fronte ao 4% en 2024, acompañado dun aumento das horas totais de ausencia”. “Esta variación reforza a importancia de seguir impulsando medidas de benestar, saúde laboral e prevención”, explica.

Puig e H&M

O xigante perfumista Puig conta tamén cunha taxa de absentismo en liña coa de Mango. O grupo catalán indica na súa última memoria que en 2025 o “total de horas perdidas” situouse en 1,25 millóns, sendo o conxunto de horas contratadas 23,6 millóns. Estas cifras arroxarían unha taxa que rondaría o 5,3%, tamén neste caso por debaixo da media de Adecco para o conxunto de España, dun 7,6% sobre as horas pactadas.

O xigante sueco H&M non aporta a cifra global de horas de absentismo do grupo debido ás distintas lexislacións por países, pero si mostra as horas de ausencia no posto de traballo da firma de moda en España, na súa última memoria do Estado de Información non Financeira. Neste caso, as horas de absentismo por enfermidade común reducíronse de 1,11 millóns en 2024 a 963.452 horas.