Moeda ao aire de Euroespes: busca un millón cunha ampliación de capital para cumprir cos seus acredores.
O consello de administración de Euroespes convoca para este luns unha xunta extraordinaria exprés co fin de aprobar unha ampliación de capital "para atender todas as súas obrigas", que tamén reforzaría, di, a súa estrutura patrimonial.
O doutor Ramón Cacabelos, presidente de Euroespes
Comentarios
Novo macht ball para Euroespes, unha das empresas galegas cotizadas que actualmente se atopa baixo a sombra dos seus acredores e do cumprimento do convenio aprobado en xuño de 2024 para superar o procedemento de suspensión de pagos. A empresa de Ramón Cacabelos propón unha nova moeda ao aire: busca un millón de euros cunha ampliación de capital para cumprir precisamente cos seus acredores. E para iso convocou unha xunta xeral extraordinaria exprés.
O consello de administración de Euroespes convoca para este luns unha xunta extraordinaria co fin de aprobar unha ampliación de capital, que tamén reforzaría, di, a súa estrutura patrimonial. A reunión do consello celebrouse este mesmo venres, e foi comunicada como feito relevante ao BME Growth.
O convenio de acredores
O consello da empresa biotecnolóxica galega acompaña a proposta de ampliación de capital para a xunta extraordinaria nun detallado informe. No documento, asegura que “consecuencia do analizado polo consello e en relación coas contas e coa finalidade de dotar de fondos á compañía para afrontar os pagos derivados do convenio de acredores e mellorar a súa situación patrimonial, o consello acorda propor á xunta xeral iniciar os procedementos para aumentar capital nun millón de euros mediante a creación de 1.663.860 accións dun valor nominal de 0,601012 euros e mediante aportacións dinerarias”.
Por tanto, de ser subscrito na súa totalidade o aumento de capital que propón Cacabelos, o capital social ascendería á cantidade total de 8,1 millóns.
Urxencias e fondos
De acordo coa comunicación realizada por Euroespes, as razóns que levan a estas propostas son varias. “O convenio de acredores, confirmado pola sentenza do pasado día 26 de xuño de 2024, estableceu un período de espera de 18 meses que vence o próximo mes de xaneiro de 2026”, asegura a compañía, nunha clara mostra de urxencia por cumprir co pactado para saír do concurso.
“Entre os recursos dispoñibles pola empresa e os que se espera alcanzar co plan comercial”, engade, “a sociedade espera poder facer fronte a eses pagos”. “Con todo”, explica, “a posibilidade de ter que afrontar imprevistos fai que sexa conveniente dotar de recursos adicionais á compañía, de maneira que unha aportación de socios ou terceiros pola vía do aumento de capital sirva para fortalecer o patrimonio social e permitir atender a todas as obrigacións da empresa”. En segundo lugar, asegura que coa aportación reforzaríase a situación patrimonial da empresa.
