Novo desafío do dono de Sargadelos: volve parar a planta de Cervo tras unha inspección de Traballo
Segismundo García ordenou que se pare a produción na fábrica de cerámica da Mariña Lucense tras recibir unha inspección "rutinaria" ás súas instalacións.
Un grupo de máis de 30 traballadores continúa ás portas da factoría Sargadelos, sen acceder aos seus postos de traballo, a 8 de abril de 2025, en Cervo, Lugo, Galicia (España). A pesar do acordo alcanzado á última hora de onte luns entre a fábrica de cerámica Sargadelos e a Xunta de Galicia para o reinicio da actividade na planta, os traballadores continúan nas portas de Sargadelos á espera de recibir información. Carlos Castro / Europa Press 08 ABRIL 2025;CERÁMICA;FÁBRICA;ACUERDO; 08/4/2025
Comentarios
Novo cisma en Sargadelos. O propietario da emblemática empresa, Segismundo García, ordenou de novo a detención da produción na planta de cerámica de Cervo tras unha nova inspección de Traballo ás instalacións.
De acordo coa axencia Europa Press, as instalacións recibiron este xoves a visita de tres persoas por parte da inspección era “rutinaria” e “en iso quedaran” en relación ao expediente aberto a comezos de ano, segundo indicou a alcaldesa do municipio lucense, Dolores García. A rexidora atopábase na mañá deste xoves alí por outras cuestións, e atopouse cos inspectores, que lle comunicaron que a visita se producía “seis meses despois” do pulso protagonizado por Segismundo García a principios de ano.
A alcaldesa tamén puido falar con algunha traballadora, e co propietario da fábrica, quen, nas súas palabras, lle comunicou “que pechaba a planta, a produción, e a paraba, para preservar a saúde dos traballadores”.
Nova tormenta en Sargadelos
Segismundo García mandou abandonar a fábrica á parte da plantilla encargada da produción e quedaron dentro, como meses atrás, os traballadores de oficina e mantemento. Ás portas da factoría, a sensación é de déjà vu e “de que isto é unha tomadura de pelo”, segundo destaca en declaracións a Europa Press o portavoz da CIG, Xorxe Caldeiro, quen lembra o sucedido a principios de ano.
Por aquel entón, o pulso que mantivo o propietario de Sargadelos coa Inspección saldouse con tres despedimentos e dous prazos: un ata despois do verán para mellorar a seguridade e outro de algo máis de tempo para obras que afectasen ao edificio, catalogado como ben de interese cultural (BIC).
Entón, Traballo abrira un expediente a Sargadelos despois de detectar que dúas traballadoras desenvolveran silicose nesta emblemática fábrica de cerámica da Mariña de Lugo. A empresa estaba obrigada a facer 36 reformas para poder facer seguros os postos de traballo. Agora, os empregados de produción volven a mostrarse “incrédulos, expectantes, cabreados e desesperados”, en palabras do representante da CIG, que este xoves desprazouse ata a factoría para interesarse pola situación e os afectados. Segundo indica, Segismundo García abandonou o lugar despois da orde de peche e “non hai explicacións”.
