Rodman alega que ‘se borró’ dun contrato de patrulleiras da Xunta para evitar a quebra

Rodman e a Consellería do Mar veranse as caras no Supremo por conta de dúas patrulleiras para o Servizo de Gardacostas. A compañía de Manuel Rodríguez recorre contra unha penalidade imposta no ano 2023 polo departamento que dirixe agora Marta Villaverde no marco do proceso de contratación das embarcacións. Este procedemento rematou coa empresa presentando a segunda mellor oferta e, tras o desistimento da empresa gañadora do concurso, Astilleros Polináutica, incumprindo un requirimento da Mesa na presentación de documentación.

O Subdirector Xeral de Coordinación Orzamentaria e Contratación concluíu que se trataba dun incumprimento “total e grave”, polo que debía impoñerse a Rodman unha penalización de 63.300 euros. Os de Manuel Rodríguez, tamén propietario de Metalships, iniciaron unha batalla xudicial para evitar a sanción que agora chega ao Supremo, despois de que a Sala do Contencioso admitise a trámite o seu recurso nun auto do pasado 22 de outubro.

Rodman perdeu previamente no Tribunal Superior de Xustiza de Galicia, que desestimou os tres argumentos principais da súa defensa: que a Xunta impuxo un prazo de imposible cumprimento na entrega das patrulleiras, que vulnerou o principio de igualdade ao non impoñer penalidade algunha a Astilleros Polináutica; e que contradixo a Lei de Contratos do Sector Público pois esta non prevé que se poida sancionar á segunda mellor oferta. O TSXG rexeitou todas as teses, que agora o Supremo valorará de novo. O estaleiro pide, ademais da anulación da penalidade, a eliminación de parte dos pregos do concurso.

Rodman di que puido acabar en quebra

A negativa de Rodman a continuar o proceso de contratación e, por tanto, entregar a documentación requirida respondeu, segundo sinala o auto, a que o prazo de construción das dúas patrulleiras era de 12 meses e entendía que era de imposible cumprimento. Os maxistrados do TSXG entraron en máis detalle respecto a este punto, ao sinalar que a compañía “admite nos seus escritos que non cumprimentou o requirimento porque, logo de estudar o contido do PCAP, entendeu que non podería cumprir en prazo coa entrega das embarcacións porque o lapso temporal do contrato era demasiado escueto e concurrían na fabricación, transporte e ubicación das mesmas unha serie de dificultades loxísticas”.

Vai máis alá a empresa olívica, pois sinalou ante o TSXG que se presentara a documentación “a empresa quedaría abocada a unha suspensión de pagos por imposibilidade de executar a prestación, dado que o contrato prevé a imposición de ingentes penalidades pola súa demora ou incumprimento executivo”.

O Supremo analizará a multa

O Supremo non valorará a posibilidade de anular o artigo do prego que reclamaba Rodman, pero si analizará a sanción imposta. Concretamente, considera de interese casacional determinar se cabe impoñer unha penalidade do 3% do orzamento base de licitación (sen IVE) ao segundo licitador cando o primeiro desatende o mesmo requirimento.

A Xunta non penalizou á empresa gañadora porque solicitou unha ampliación do prazo, o que, a entender da Consellería do Mar, supoñía un incumprimento dos pregos pero non do requirimento, pois respondera a el.