Fitch volve a mellorar o rating de Abanca, que encadea sete subidas nun ano.
A axencia de cualificación destaca o avance na calidade dos activos así como a capitalización da entidade financeira, xunto a outros aspectos como a maior rendibilidade.
O presidente de ABANCA, Juan Carlos Escotet. – Jesús Hellín – Europa Press
Comentarios
Nova respaldo das axencias de cualificación a Abanca. Fitch elevou o rating (Long – term IDR) da entidade financeira un chanzo, ata BBB+ con perspectiva estable. É a segunda vez que a firma mellora a valoración do banco nos últimos 12 meses, despois da subida comunicada en febreiro de 2025.
Fitch fundaméntase, principalmente, na mellora da calidade de activos e na capitalización de Abanca, aínda que tamén destaca a boa evolución do banco en aspectos como a rendibilidade. Nos primeiros nove meses do ano, a entidade que preside Juan Carlos Escotet obtivo uns beneficios de 670,4 millóns, cun ROTE do 15,1%.
A axencia de cualificación tamén elevou o rating de viabilidade de Abanca, que pasa de bbb a bbb+; o rating da débeda senior preferred, de BBB a BBB+; o rating de débeda subordinada Tier2, de BB+ a BBB- (co que entra en grao de investimento); e o rating dos instrumentos AT1 (CoCos), de BB- a BB.
Coa nova cualificación, o banco herdeiro das antigas caixas galegas suma sete subidas nun ano. Ademais de Fitch, durante 2025 melloraron o rating de Abanca outras tres axencias. DBRS e Moody’s sitúana nun rango A, o máis elevado na valoración de emisores.
A solvencia de Abanca
A confianza de Fitch é a segunda boa nova que recibe Juan Carlos Escotet no que vai de ano, pois o Banco Central Europeo tamén concedeu a Abanca a autorización para utilizar os seus propios modelos de avaliación de risco á hora de calcular os requisitos de capital. O fito non é menor, pois requiriu superar un exame de cinco meses dos supervisores europeos e porque a validación abrangue a práctica totalidade da carteira minorista en España.
A entidade calcula que ao adoptar a aproximación IRB (Internal Ratings-Based) poderá incrementar en 120 puntos básicos o seu cociente de capital. A priori, isto permitiríalle situarse nun CET-1 por encima do 14,5% e asomarse á lideranza en solvencia na banca española.
