A Asociación pola Defensa da Ría de Pontevedra cualifica de “parche custoso e ineficaz” o proxecto de dragado do Lérez.

Á Asociación Pola Defensa da Ría de Pontevedra (APDR) non lle convence o proxecto de dragado do río Lérez, que cualifica como un “parche custoso e ineficaz”, e piden a súa suspensión. “É pan para hoxe e fame para mañá”. A entidade fixo pública nunha nota de prensa a súa posición tras a finalización do período de exposición pública do proxecto de dragado do río Lérez promovido por Portos de Galicia, un proceso no que a entidade participou activamente mediante a presentación de numerosas alegacións.

Neste contexto, APDR recoñeceu a necesidade de acometer actuacións para paliar a acumulación de sedimentos e lodos no ecosistema río-ría, dada a súa “incidencia negativa” sobre os sectores produtivos e deportivos.

Con todo, advertiron de que a proposta actual constitúe “un parche” que non resolverá o problema de fondo e que, ademais, “pode xerar novos impactos ambientais no río Lérez e nas rías de Pontevedra e Arousa, afectando aos seus sistemas produtivos”.

Segundo especificaron, o proxecto non aborda as causas que orixinan a acumulación de sedimentos, como os recheos, verteduras industriais e fecais ou determinadas prácticas forestais que favorecen a erosión. Ao seu xuízo, sen actuar sobre estes factores, “máis cedo que tarde o río volverá á situación actual”. Así mesmo, criticaron que o ámbito limitado de actuación previsto podería mesmo acelerar o proceso de sedimentación.

“Elevada contaminación”

Tamén cuestionaron a metodoloxía empregada na recollida e análise de mostras, ao considerar que se tomaron mostras superficiais e se descartaron aquelas que consideran perigosas pola súa “elevada contaminación”. Uns sedimentos que, aseguran, van permanecer no Lérez e pola acción do dragado provocarán contaminación.

En relación coa execución do proxecto, a APDR alerta de que a natureza fina dos sedimentos favorecerá a súa dispersión durante o dragado provocando un “forte impacto na calidade das augas”.

Ademais, a entidade puxo o foco no impacto sobre o sector marisqueiro, indicando que antes do inicio das obras sería necesario retirar o marisco de talla comercial e trasladar os exemplares máis pequenos. Unhas operacións que, afirman, repercutirán “negativamente” nos ingresos do sector, que, ademais, non poderá faenar durante a execución do proxecto.

Finalmente, alertou de que a zona proposta para o vertido dos sedimentos — próxima á illa de Sálvora —, resulta “inaceptable” polos seus efectos “nocivos” sobre os bancos marisqueiros, derivado do desprazamento dos áridos nas correntes mariñas.

Por todo iso, APDR pediu a suspensión do proxecto mentres non se corrixan as deficiencias detectadas, ao considerar que se trata dunha actuación “custosa e ineficaz”, que suporía “pan para hoxe e fame para mañá”.