A patronal galega denuncia o “illamento ferroviario” de Ferrol e reclama a súa conexión ao Corredor Atlántico

A Confederación de Empresarios de Galicia lamenta a situación de “illamento ferroviario inxustificado en pleno século XXI” que vive a comarca de Ferrolterra, unha “discriminación territorial” de Galicia que “lastra a nosa competitividade empresarial”, e pide a súa conexión ao pide que Ferrol se integre no Corredor Atlántico de Transporte.

Así o defendeu este venres o presidente da patronal, Juan Manuel Vieites, no almorzo informativo organizado polo Club de Prensa de Ferrol, no marco das súas habituais “Conversas non Parador”, que se celebran no Parador Nacional da cidade naval desde hai unha década.

O presidente da patronal desgranou necesidades en materia de infraestruturas de transporte e loxística en Ferrol achegando a súa visión económica da situación. Vieites foi contundente ao sinalar que a rede ferroviaria galega acumula “limitacións de velocidade, infraestrutura obsoleta e falta de mantemento”, o que, segundo un estudo da Confederación Empresarial de Ferrolterra, Eume e Ortegal (COFER), provoca que só o 5 % dos viaxeiros entre as dúas cidades opte polo tren fronte ao 85 % que usa o vehículo privado.

“É un servizo indigno, con tempos excesivos e material rodante obsoleto”, sentenciou, esixindo unha “modernización integral” que inclúa dobre vía, electrificación e frecuencias adaptadas á demanda laboral e académica.

Corredor Atlántico do Noroeste

Vieites tamén puxo o foco no proxecto do Corredor Atlántico do Noroeste, anunciando que o próximo 23 de xuño liderará unha delegación galega en Bruxelas xunto aos seus homólogos de Asturias e Castilla e León para reclamar unha “execución xusta e completa” da rede.

Neste contexto, defendeu a inclusión do porto de Ferrol na rede básica transeuropea, alegando que “se cumpre as condicións que marca a Comisión Europea, por que non o vai ter?” e que “as normas están para cumprilas”. O empresario advertiu que crearán un “xemelgo dixital” para fiscalizar o ritmo real das obras fronte ao planificado polo Ministerio.

Outras críticas

No plano laboral, o presidente da CEG arremeteu contra a xestión do Ministerio de Traballo, ao que acusou de practicar un “intervencionismo ideolóxico” que “quebra o diálogo social”.

Así, tachou de “trampa” o incremento do 3,1% do Salario Mínimo Interprofesional (SMI) aprobado polo Goberno, ao considerar que se impón “por real decreto” sen respectar os convenios colectivos nin a concertación coas empresas. “Ese intervencionismo debilita o modelo de negociación que permitiu décadas de acordos equilibrados”, afirmou.

Vieites mostrouse especialmente belixerante coa iniciativa lexislativa sobre ‘democracia no traballo’ promovida pola vicepresidenta segunda, Yolanda Díaz, que propón a presenza de traballadores nos consellos de administración. “Isto vai contra a liberdade de empresa”, espetou, augurando que, ao contrario do SMI, estas medidas “non van pasar o filtro do Congreso dos Deputados”.

Retos de Ferrolterra 

A pesar do ton crítico, o dirixente empresarial recoñeceu o “bo momento” que vive a comarca grazas ao ‘tirón’ do sector naval, aínda que advertiu da necesidade de diversificar o tecido produtivo e de abordar a escaseza de persoal cualificado.

Neste sentido, reclamou unha Formación Profesional Dual adaptada ás novas demandas dixitais e ‘verdes’.

Preguntado pola falta de solo industrial na cidade, Vieites relativizou o problema sinalando que “non se pode ver a cidade só polo seu territorio, senón polos seus arredores”, en referencia aos polígonos da área metropolitana.

Así mesmo, abogou por finalizar a conexión ferroviaria co porto exterior para converter Ferrol nun “nodo estratéxico” no comercio marítimo do Arco Atlántico, sempre que se acompañe dunha “planificación loxística ambiciosa”.