A patronal galega, sobre a entrada dos traballadores nos consellos de administración: “Desnaturaliza a súa función”

• A CIG acusa a Yolanda Díaz de "ningunear" a todo o sindicalismo alternativo a CC OO e UGT.
• O Supremo desestima a querela de Baltar contra Yolanda Díaz por afirmar na radio que "conducía ebrio"

Preocupación na Confederación de Empresarios de Galicia (CEG) pola proposta do Ministerio de Traballo sobre a entrada obrigatoria de representantes dos traballadores nos consellos de administración, con cotas de ata a metade dos asentos en determinadas empresas, así como a atribución de dereitos de veto e capacidade decisoria en materias estratéxicas.

O presidente da patronal, Juan Manuel Vieites, considera que “este plantexamento non só desnaturaliza a función do órgano de administración, senón que introduce un risco evidente de bloqueo na toma de decisións, perda de axilidade e conflitos de interese que poden comprometer a viabilidade das empresas”.

En canto ao acceso obrigatorio dos traballadores ao capital da empresa, a CEG considera “inaceptable que se pretenda impoñer porcentaxes de participación accionarial sen achega económica algunha, sen asunción de riscos patrimoniais e sen responsabilidades equivalentes ás do resto de socios”.

“Recoñecer aos traballadores como investidores laborais sen investimento nin risco real supón unha distorsión do concepto mesmo de propiedade e unha grave inseguridade xurídica para empresarios, investidores e emprendedores”, asevera.

Non son as únicas propostas que inquietan. A patronal manifestou a súa “profunda preocupación” polo contido do informe sobre democracia no traballo presentado pola vicepresidenta segunda, Yolanda Díaz, “e polo enfoque ideolóxico que volve a impregnar as iniciativas do seu departamento”.

Unhas iniciativas que, para a patronal galega, están “unha vez máis afastadas da realidade económica e empresarial do país e, en particular, do tecido produtivo galego”.

Para os empresarios galegos, o informe plantea un cambio “radical” do modelo empresarial e de relacións laborais “baixo o pretexto” do desenvolvemento do artigo 129.2 da Constitución, “pero faino mediante propostas que supoñen unha intervención directa na propiedade privada, na liberdade de empresa e na capacidade de xestión, piares básicos de calquera economía moderna e competitiva”.

“Utilización da fiscalidade”

Así mesmo, rexeita “frontalmente” a CEG a utilización da fiscalidade, a contratación pública e as cotizacións sociais “como instrumentos de presión ideolóxica, penalizando as empresas que non se axusten a un determinado modelo de democracia interna, definido unilateralmente polo Goberno”.

“Este enfoque introduce unha discriminación inaceptable entre empresas, desincentiva a inversión e sitúa España en clara desvantaxe competitiva fronte ao noso entorno europeo”, afirma.

Vieites lembra que o tecido empresarial galego está formado maioritariamente por pemes e empresas familiares, “moitas delas con dificultades reais de relevo xeracional”. “En lugar de facilitar a súa continuidade e crecemento, este tipo de propostas xeran incerteza, desconfianza e unha mensaxe moi negativa para quen arriscan o seu patrimonio, crean emprego e sosteñen a actividade económica”, sentenza.

A CEG reitera que a participación dos traballadores, o diálogo social e a mellora das condicións laborais son obxectivos “lexítimos e compartidos”, pero cre que “deben acadarase a través do acordo, a negociación colectiva e o respecto ao marco constitucional e europeo, non mediante imposicións que poñen en cuestión a propiedade privada e a liberdade de empresa”.

“Pedimos ao Goberno e, en particular, ao Ministerio de Traballo, que abandone as ocurrencias ideolóxicas e se centre en políticas realistas, orientadas a mellorar a produtividade, reducir a carga burocrática e fiscal, e reforzar a competitividade das nosas empresas, que son as únicas capaces de xerar emprego estable e riqueza sostible en Galicia e no conxunto de España”, urxe Vieites.