Yolanda Díaz anuncia a súa despedida do Congreso: «Non vou ir en ningunha lista»

• Yolanda Díaz di que o plan da Xunta contra o fraude das baixas “criminaliza” aos traballadores
• Rueda carga contra Yolanda Díaz polo seu ‘non’ ao control do fraude nas baixas laborais e buscará «consenso»

Yolanda Díaz anuncia o peche da súa etapa no Congreso dos Deputados. A vicepresidenta segunda do Goberno e ministra de Traballo e Economía Social confirmou este domingo que esta será a súa última lexislatura na Cámara Baixa.

“Non vou ir en ningunha lista ao Congreso; categóricamente non”, desvelou nunha entrevista concedida á Cadena Ser. Nela, Yolanda Díaz subliñou que é unha decisión tomada un ano antes e ao seu parecer, a política “ten que ser unha estación de paso”. “Creo que a política é demasiado importante e é unha ferramenta para cambiar a vida da xente e eu, estea onde estea, vou seguir facendo o que fago, é dicir, contribuíndo a un ben común”, asegurou.

Yolanda Díaz abrirá unha nova etapa na que explicou que quere dedicarse á súa familia, tras sufrir a recente perda do seu pai este ano. “Quero ter tempo para a miña vida privada e para a miña filla Carmela“, sinalou.

Preguntada por un posible regreso a Galicia, Yolanda Díaz evitou responder directamente. “Eu nunca me fun de Galicia, nunca, son galega e síntome moi orgullosa, pero agora mesmo estou en esgotar esta lexislatura e moitas normas nas que estamos a traballar”, indicou. Neste contexto, a vicepresidenta segunda quixo trasladar unha mensaxe de “tranquilidade”, afirmando que o Goberno “esgotará a lexislatura sen ningunha dúbida”. Ademais, mostrouse confiada de cara ás próximas eleccións, nas que defende que “volverán gañar”.

“Non vou estar, pero vou estar no meu espazo político. Vou facer todo o que poida aportar para que non chegue a Moncloa o señor Abascal e o señor Feijóo“, subliñou. É por iso que chamou á unión da esquerda, e “máis que os nomes das persoas” aposta por construír unha ferramenta que “de esperanza” á xente progresista. “Poñamos o acento no que nos une”, pediu.

Entre Feijóo e Rueda

En relación co líder dos populares, Díaz recriminou que Feijóo está “secuestrado por Vox“, poñendo como exemplo unha materia na que “Galicia e o PP nunca tiveron problemas” como é a acollida de menores.

“Hai unha semana boicotearon a Conferencia Sectorial presidida pola ministra Sira Rego negándose a abordar unha materia tan importante. O problema que ten o PP é Vox e non se decatan de que con este discurso pois están a ser un granxeiro de votos para Vox“, criticou.

Así mesmo, a ministra asegurou que Feijóo “ten unha pinza entre Vox e os ultras do seu partido” desde que chegou a Madrid e non manda el, senón “o señor Aznar e Ayuso“.

En paralelo, Yolanda Díaz tamén foi preguntada sobre se recorrerá ao Constitucional se a Xunta crea unidades especializadas contra o fraude nas baixas, unha medida incluída no plan de control de baixas laborais que impulsa o Executivo autonómico. Tema que centrará o pleno do Parlamento de Galicia que terá lugar esta semana.

Ao respecto, a ministra de Traballo lembrou que a competencia sobre esta materia é unha competencia exclusiva do Estado, polo que, afirmou que se “o presidente Rueda se empeña en continuar cunha norma que invade competencias estatais” irán ao Constitucional, para “defender os dereitos dos traballadores”.

“O que debería facer o señor Rueda o día do Debate do Estado da Nación é anunciar que vai poñer os profesionais necesarios en Galicia na sanidade pública para que sexamos capaces de ser atendidos en tempos rápidos e breves como merecemos o conxunto de cidadáns e cidadás do noso país”, remarcou.

Neste sentido, relatou que a pesar das listas de espera da Comunidade, a aposta do presidente da Xunta foi crear un organismo “privatizando aínda máis” unha parte da xestión que ten que ver coas mutuas profesionais. “Por tanto, non comparto nada”, rematou.