A ‘startup’ Birdmind, premiada polo seu potencial na produción de taboleiros sostibles a partir de residuos

A pontevedresa Birmind foi galardoada nos Premios Emprende XXI como a empresa innovadora con maior potencial e impacto en Galicia. Estes premios, impulsados por CaixaBank a través de DayOne, a súa división especializada en empresas tecnolóxicas e os seus investidores, e o Ministerio de Industria e Turismo a través de Enisa, celebran este ano a súa décimo novena edición. A entrega destes galardóns en Galicia conta co apoio do Igape.

Na presente edición, os premios puxeron o acento en identificar e recoñecer proxectos que xeren valor a través da tecnoloxía, melloren a vida das persoas e coiden o planeta con solucións tecnolóxicas.

Producir taboleiro sen consumir auga

Birmind, representada polo seu fundador e CEO, David Camba, é unha empresa de Pontevedra que desenvolve novos materiais dirixidos aos sectores da decoración, o interiorismo e o contract. Produce taboleiros sostibles a partir de residuos ecolóxicos, cun proceso automatizado, sen consumo de auga e baseado en enerxías renovables. O taboleiro RiceTab fabricado a partir de casca de arroz é o primeiro produto que a compañía lanzou ao mercado. O seu proxecto resultou seleccionado entre as 45 candidaturas que se presentaron na última edición dos galardóns en Galicia. Os Premios Emprende XXI consolidáronse como un referente clave para o ecosistema emprendedor tanto a nivel nacional como autonómico.

Na entrega de premios estiveron presentes profesionais de CaixaBank, Enisa e Igape, entre outros. O xurado encargado de seleccionar á empresa gañadora estivo composto por nomes relevantes do ecosistema autonómico de emprendemento, como XesGalicia, Unirisco, Bioga, The Food Tech Lab e as universidades galegas. Ademais, contou coa participación de Adrián Senar, CEO de Kreios Space, empresa gañadora da edición 2025, que puido falar da súa experiencia dentro desta iniciativa.