AVE Galicia-Portugal: Lisboa ratifica prazos e Rueda insta o Goberno a «cumprir a súa parte»

A Comisión de Coordinación e Desenvolvemento Rexional do Norte de Portugal (CCDR-N) ratificou as previsións dadas polo país luso para o AVE Porto-Vigo. Así o trasladou o presidente do órgano luso, Álvaro Santos, a Alfonso Rueda nun encontro tras o que o mandatario galego instou ao Goberno de España a “cumprir a súa parte”.

A deste venres foi a primeira reunión institucional tras a elección de Santos, un encontro que estivo marcado polo impulso á cooperación transfronteiriza e á conexión ferroviaria de alta velocidade entre Galicia e o norte de Portugal.

Ambos destacaron a “relación frutífera” nesta Eurorrexión que “tantos anos leva traballando e logros alcanzou”, ademais de remarcar as relacións entre o Norte de Portugal e Galicia, por ser “máis fluídas, diarias, e con uns resultados máis completos”.

Entre os asuntos abordados, Alfonso Rueda apuntou á conexión de alta velocidade Porto-Vigo, asegurando que, aínda que as competencias non residen na Xunta nin na CCDR-Norte, “teñen moito que dicir”.

Ao respecto, agradeceu a Santos que lles confirmase que todo o que foi comunicando o Goberno luso sobre os traballos en marcha e prazos comprometidos “se mantén de maneira estrita”. Polo que apelou directamente ao Goberno de España para demandar que “faga nin máis nin menos que a súa parte e que cumpra igual que vai cumprir o goberno portugués”.

En materia de cooperación europea, ambos dirixentes abordaron o peche do actual período económico da Unión Europea (UE) e a planificación de futuras convocatorias de fondos POCTEP, co obxectivo de que a eurorrexión Galicia-Norte de Portugal continúe sendo “a cooperación transfronteiriza con máis proxectos e máis fondos da Unión Europea”.

Incremento de peregrinos

A reunión tamén serviu para analizar o “incremento exponencial de peregrinos” a través dos dous camiños cara a Santiago que comezan en Portugal, especialmente o Camiño da Costa. “Creo que neste momento, apenas seis meses do 2027 — Ano Xacobeo –, é moi oportuno ver como podemos mellorar a experiencia dos portugueses que comezan o seu periplo cara a Santiago en Portugal”, expresou o mandatario galego.

Ademais, o presidente da Xunta citou outros aspectos abordados como a oportunidade que supón a lusofonía e as “vantaxes de compartir en gran parte linguas que teñen moito en común”, especialmente no escenario que se abre con Mercosur, para aproveitar “estes enormes mercados”.

Finalmente, Rueda agradeceu a disposición de Santos e o seu equipo nesta primeira toma de contacto, mentres que o dirixente portugués defendeu que, nun contexto xeopolítico “particularmente quente” de acontecementos a nivel xeopolítico resulta fundamental promover “o benestar das poboacións e a competitividade dos territorios”.