Un galego viaxa a bordo do ‘MV Hondius’, o cruceiro con hantavirus

A Consellería de Sanidade confirmou que un galego viaxa a bordo do cruceiro de luxo MV Hondius, onde se declarou un brote de hantavirus que provocou ata o momento tres falecidos. O barco, que partiu do porto arxentino de Ushuaia e dirixíase a Cabo Verde, con destino final Canarias, transporta un total de 147 persoas, incluíndo 88 pasaxeiros e 59 tripulantes. Deles, 13 pasaxeiros e un tripulante son de nacionalidade española, cinco dos cales residen en Cataluña.

O pasado sábado 2 de maio, a Organización Mundial da Saúde (OMS) recibiu unha notificación do Punto Focal Nacional do Regulamento Sanitario Internacional do Reino Unido sobre un brote de enfermidade respiratoria grave de causa inicialmente descoñecida, con tres falecementos e un caso en estado crítico, a bordo dun cruceiro con bandeira dos Países Baixos.

Ese mesmo día, as probas de laboratorio confirmaron a infección por hantavirus nun dos casos e, adicionalmente, notificáronse dous casos sospeitosos con síntomas respiratorios leves e/ou síntomas gastrointestinais. Dous dos pasaxeiros falecidos realizaran unha viaxe por Sudamérica, antes de embarcar no cruceiro, e descoñécese o grao de contacto dos pasaxeiros coa fauna local durante a viaxe ou antes do embarque.

Risco baixo de transmisión

Actualmente, o barco atópase en Cabo Verde, onde as autoridades dos estados implicados están a levar a cabo a investigación epidemiolóxica e as accións de saúde pública necesarias para a prevención e control deste evento, garantindo a seguridade sanitaria global.

Os hantavirus transmítense principalmente polo contacto con feces ou ouriños de roedores infectados ou con superficies contaminadas e, dado que os hantavirus presentes en Europa non se transmiten de persoa a persoa e que non se detectou ningún caso de infección en España, o risco xeral de transmisión desta enfermidade considérase “moi baixo”.