Zara deféndese nos xulgados da denuncia de Estée Lauder, o xigante que pretende a Puig, por unha colonia
A marca estrela de Inditex nega ante a xustiza británica ter infringido a marca rexistrada Jo Malone de Estée Lauder.
A presidenta de Inditex, Marta Ortega, durante a inauguración da exposición de Annie Leibovitz ‘Wonderland’ na Fundación Marta Ortega Pérez. M. Dylan/Europa Press
Comentarios
Novo capítulo do caso Jo Malone, que enfronta a Inditex co xigante americano da cosmética Estée Lauder, compañía que, na actualidade, pretende á catalana Puig. A firma estadounidense levou ante os xulgados británicos á perfumista Jo Malone e á filial de Zara no Reino Unido polo uso da marca nunha liña de fragrancias da compañía de Marta Ortega. Os de Arteixo, segundo Reuters, defenderonse asegurando que non incumpren ningún dos preceptos que, no seu momento, pactaron cos avogados de Lauder.
Para entender a orixe do litixio é necesario antes saber que pasa coa marca en cuestión. En 1999, a afamada perfumista vendeu a enseña que leva o seu nome a Estée Lauder así como cedeu os dereitos do nome. Non obstante, en 2006 cesou como directora creativa na multinacional, que lle impuxo unha das habituais cláusulas de non competencia dentro do sector por un período de cinco anos. Tamén lle prohibiron usar o termo Jo Malone con fins comerciais.
Colaboración con Zara
Foi en 2011, despois de que a cláusula anticompetencia expirase, cando a británica creou a firma de perfumes Jo Loves, coa que anos despois, en 2019, iniciaría unha colaboración con Zara. A demanda de Estée Lauder procede do uso do nome Jo Malone como reclamo comercial.
Os perfumes de Zara froito da colaboración coa perfumista presentan a seguinte mensaxe: “En colaboración coa perfumista Ms. Jo Malone CBE, fundadora de Jo Loves”.
O uso da marca non convence a Estée Lauder, que a principios de ano optou por denunciar tanto á que fora a súa empregada como á filial británica de Zara. Os estadounidenses defenden que “cando a señora Jo Malone vendeu a marca en 1999, aceptou termos contractuais claros que incluían absterse de usar o nome Jo Malone en certos contextos comerciais, incluída a comercialización de fragrancias”. Aseguran que só están protexendo a marca Joe Malone London, na que investiron durante décadas.
Inditex cumpre as normas
Como vén sendo habitual, Inditex mantivo mutismo sobre este procedemento legal. Non obstante, Reuters asegura que tivo acceso ao escrito de defensa da compañía, asegurando que usa o nome da perfumista nas fragrancias que comercializa dentro da súa colaboración con ela de acordo cos principios que pactou con Lauder en 2020.
Segundo Reuters, Inditex alegou no seu escrito de defensa que Estée Lauder se queixou en agosto de 2020 do uso do nome Jo Malone nunha publicación da web de Zara en China pero que, finalmente, os avogados da empresa americana concederon que se atopaba dentro do ámbito permitido.
Asegura a publicación que os avogados de Estée Lauder determinaron que Zara debía usar os termos Jo Malone CBE, Sra. Malone ou Sra. Jo Malone para diferenciar á persoa da marca, e nunca referirse a ela como fundadora da marca de fragrancias Jo Malone, que segue comercializando Lauder.
Zara defende que sempre se axustaron a estes supostos, actuando dentro da legalidade. Na súa defensa tería defendido que o caso xudicial plantea unha cuestión máis ampla e que radica en como a señora Malone pode referirse a si mesma.
