A marcha dos portos en Galicia: Ferrol, A Coruña, Marín e Vilagarcía aumentan tráficos e Vigo redúcese un 6%

O tráfico total dos portos galegos aumentou no mes de maio respecto ao mesmo período do ano anterior, agás en Vigo, onde se rexistrou un lixeiro descenso do 5,64 %, ao pasar das 516.693 toneladas ás 487.564. O maior crecemento rexistrouse en Marín e Ría de Pontevedra, onde se incrementaron un 32 % as 229.255 toneladas do quinto mes do ano pasado, ata as 302.916.

No caso de A Coruña, o crecemento ronda o 10 %, tras aumentarse os 1,12 millóns de toneladas a 1,24 millóns, un porcentaxe similar ao de Vilagarcía, onde o incremento supera as 12.000 toneladas. En Ferrol, o tráfico total pasou das 643.551 toneladas ás 659.857, o que supón un aumento do 2,5 %.

Respecto á variación anual do tráfico total, a Autoridade Portuaria de Ferrol é a que experimenta o maior crecemento, cun 13,3 %; o porto aumentou dos 2,7 millóns de toneladas rexistrados nos cinco primeiros meses do ano pasado aos 3,14 millóns. En segundo lugar sitúase Vilagarcía, que aumenta os tráficos un 11,2% ata case 671.000. Pola súa banda, Marín, A Coruña e Vigo reducen os seus tráficos, con caídas do 6,7 %, 3,2 % e 1,9 %, respectivamente.

Mercadoría xeral en contedores 

No tráfico de contedores, o porto de Ferrol sitúase á cabeza tras cuadriplicar o movemento rexistrado en maio de 2025, cando se contabilizaron un total de 18.434 toneladas. O pasado maio, a cifra ascendeu ás 62.248. A pesar deste crecemento, no acumulado anual o balance continúa sendo negativo, con 97.299 toneladas, un 29,5 % menos que no mesmo período do ano anterior. Pola súa banda, en Vilagarcía o tráfico aumentou en 8.915 toneladas, un 37 % máis, ata acadar as 37.979 toneladas.

Vigo superou as 285.000 toneladas, por debaixo das 298.000 rexistradas no mesmo mes do ano anterior. Pola súa banda, en Marín o tráfico de mercadorías en contedores reduciuse un 13 %, tras rexistrar 42.082 toneladas, unhas 6.500 menos que no mesmo mes do ano anterior.

Graneis líquidos e sólidos

Ferrol tamén lidera o crecemento en maio no tráfico de graneis líquidos, ao aumentar case un 46 % ata rozar as 351.000 toneladas. No caso de A Coruña, o incremento sitúase arredor do 3%, o que eleva o tráfico ata case 842.000 toneladas. No acumulado anual, o maior crecemento rexistrouse en Vigo, onde se pasou das 6.458 toneladas contabilizadas no mesmo período do ano anterior ás 19.480, o que supón un incremento do 201 %.

En graneis sólidos, o porto da Coruña aumentou o seu tráfico no quinto mes do ano ata as 340.000 toneladas, un 24 % máis. En Marín, o volume pasou de case 109.000 a 187.000 toneladas, mentres que en Vilagarcía aumentou de 27.000 a 36.881 toneladas, un 37 % máis.

As caídas rexistráronse no porto de Ferrol, onde o tráfico de graneis sólidos descendiu case un 48 % ata as 154.000 toneladas. En Vigo, o tráfico reduciuse en 1.511 toneladas, ata situarse nas 30.274. No que vai de ano, todos os portos, agás Vilagarcía, que aumenta un 24,3 %, rexistran descensos: A Coruña (-12,5 %), Ferrol (-5 %), Marín (-20 %) e Vigo (-10,8 %).