Actualizado
Comentarios
O encontro ‘Investir en Ciencia si é rendible’ premia a Centum, Biocat, Ysios e a USC
O conselleiro de Educación, Román Rodríguez, reivindica a importancia de investir en ciencia para lograr unha Galicia "innovadora, competitiva e sostible" nunha xornada que reuniu a 200 persoas, entre elas, investigadores, investidores, empresarios ou profesionais de centros tecnolóxicos.
Eva Méndez recolle o premio póstumo a Raúl Martín-Ruíz (Ysios Capital) no encontro Investir en ciencia si é rendible
Comentarios
A xornada de clausura da IV edición do encontro Investir en ciencia si é rendible reuniu unhas 200 persoas entre investidores, representantes das oficinas de transparencia das universidades, de startups, de centros tecnolóxicos, investigadores e empresas, entre outros. O acto serviu para facer un recoñecemento a catro profesionais vinculados á innovación e á investigación en Galicia, mediante a entrega dos premios Investir en ciencia si é rendible.
O encontro, organizado por Unirisco e Xesgalicia, entregou o galardón Ecosistema para a directora de innovación de Biocat, Nuria Martí; o premio Empresa recaeu no CEO de Centum, Héctor Estévez, e os galardóns Honorífico foron para o reitor da Universidade de Santiago de Compostela, Antonio López, e para o socio de Ysios Capital Raúl Martín-Ruíz a título póstumo e que recolleu Eva Méndez.
Investimento en I+D
O conselleiro de Educación, Ciencia, Universidades e FP, Román Rodríguez, participou no evento de clausura, no que reafirmou o compromiso da Xunta nesta materia e destacou o potencial de Galicia como pólo emerxente de innovación e de atracción de investimentos por contar cun ecosistema cohesionado, ferramentas claras e unha planificación que dá confianza ao sector. “Mostra disto é que segundo as últimas estatísticas do INE, o investimento en I+D volveu medrar en Galicia ata acadar a cifra récord de 1.058 millóns”, engadiu Román Rodríguez, que estivo acompañado pola directora da Axencia Galega de Innovación, Carmen Cotelo.
Román Rodríguez entrega o galardón a Antonio López
Galicia conta cun ecosistema “estructurado, completo e ambicioso”, afirmou o titular de Ciencia, quen fixo fincapé nos instrumentos que pon o Goberno autonómico a disposición dos axentes da I+D+i para reforzar a súa actividade. Por iso, animou o sector privado a apostar pola ciencia. Destacan o Mapa de apoios á I+G+i 2026 e o Plan galego de investigación e innovación 2025-2027 como ferramentas que contribúen a dar estabilidade e visión de futuro. En concreto, o Mapa para 2026 inclúe 35 liñas de axuda de distintos departamentos dotadas con 261 M€ de orzamento.
Entre as liñas de axuda máis consolidadas e con maior éxito, o conselleiro Román Rodríguez mencionou programas como Oportunius, que contribúe a atraer e consolidar talento investigador de excelencia, ou Ignicia, que apoia a chegada dos resultados da investigación ao mercado, transformando a ciencia en innovación real.
