O pulso entre China e EEUU, a minería e os incendios acaparan os focos na nova reunión anual do Foro Económico en Muxía
O Foro Económico de Galicia celebrou este xoves a primeira das dúas xornadas da súa XV Reunión Anual no Parador de Muxía, que contou con 70 asistentes.
Imaxe dos asistentes á primeira xornada da XV Reunión Anual do Foro Económico de Galicia en Muxía / Foro Económico de Galicia
Comentarios
O Parador de Muxía engalanouse este xoves para acoller a primeira xornada da XV Reunión Anual do Foro Económico de Galicia. Máis de 70 personalidades do mundo empresarial, político, universitario, así como de organismos internacionais e económicos deron cita neste encontro que contou cun total de tres mesas.
A primeira delas, que levaba por título, Economía global, cadeas de valor e as 3 GEOs: xeoestratexia, xeopolítica e xeoeconomía, contou coa presenza de Francisco Carballo (Universidade do Miño); María Bastida (Universidade de Santiago de Compostela); Fernando González Laxe (Universidade da Coruña), e María Montalvo Freire (Megasa). Nel destacouse o traslado do centro económico mundial cara Asia, o papel de Europa e Estados Unidos no contexto actual e a necesidade de respostas xeoestratéxicas para limitar a fraxilidade e a incerteza na economía.
Posteriormente foi quenda da mesa Minería en Galicia: retos e proxectos. Nel abordáronse as oportunidades que se lle abren a Galicia con estes proxectos sempre que se executen con transparencia e responsabilidade, cumprindo todas as esixencias legais e de protección medioambiental. Esta mesa contou coa presenza de Emilio Bruquetas (Recursos de Galicia); Alberto Lavandeira (Atalaya Mining); José Manuel Saldaña Oliete (Samca), e Manuel Soto Castiñeira (Adega e Universidade da Coruña).
Por último, na quenda da tarde celebrouse o coloquio Incendios forestais: como abordar as causas e mitigar os seus efectos. Nel participaron Edelmiro López (Universidade de Santiago de Compostela); Juan Picos (Universidade de Vigo); Nuria Rodríguez Arias (LugoMadera); e Fantina Tedim (Universidade do Porto) e puxéronse os focos na necesidade de xerar actividade económica no medio rural para evitar o despoboamento e o risco de incendios nestas zonas, un problema xa crónico en Galicia.
A xornada do venres
O evento celebrará a súa segunda xornada este venres e farano cunha mesa que levará por título O bo momento da economía española ante os desafíos globais, que será presentada pola conselleira de Ecoener e do Real Club Deportivo da Coruña, Marta Fernández Currás. Nel daranse cita Luiz De Mello (director de estudos de país da OCDE) e Raymond Torres (director de Coiuntura Económica de Funcas).
A última das mesas será Financiamento autonómico: unha guía para non perderse, que estará moderada polo director de Economía Digital Galicia, Julián Rodríguez. Contará coa presenza do conselleiro de Facenda, Miguel Corgos; María Cadaval (Universidade de Santiago de Compostela); Santiago Lago Peñas (Universidade de Santiago de Compostela), e Xoaquín Fernández Leiceaga (Universidade de Santiago de Compostela).
