Os sindicatos mantén a folga en Atención Primaria ante os avances “mínimos” de Sanidade.

CIG-Saúde, CSIF, CCOO e UGT mantén a folga en Atención Primaria prevista para a próxima semana ante os avances “mínimos” ofrecidos pola Consellería de Sanidade. O comité de folga representado polos sindicatos reuniuse con representantes do Sergas este luns, que lles presentaron unha nova proposta que segue sen satisfacer as esixencias das organizacións.

“A administración vende como avance o que non é máis que un movemento mínimo e insuficiente, mentres evita afrontar os puntos centrais que provocaron a folga”, alegan os sindicatos nun comunicado.

Consideran que a proposta sobre as prazas de FEAP segue sendo “inaceptable”, posto que non aseguran a retirada da categoría nin a reconversión das prazas actuais.

Avanzan algunhas das propostas, como a consolidación do transporte para a atención domiciliaria, a retribución ao persoal dos PAC que realiza prolongacións de xornada en atención ordinaria en función do modelo de prolongación realizada, a redución do tramo incentivado de xornada complementaria de 160 a 140 horas no PAC, a equiparación do valor da xornada complementaria dos enfermeiros de PAC co dos enfermeiros de atención ordinaria, e o incremento do complemento de manutención dos PAC.

Non aceptarán “máis trampas”

Con todo, consideran que estas medidas son “insuficientes”, dado que os puntos clave que levaron á convocatoria de folga “seguen sen unha proposta enriba da mesa”. “O Sergas límitase a falar de prazos e estudos, retrasando deliberadamente solucións urxentes”, lamentan.

Por iso, e aínda cunha próxima reunión xa á vista prevista para o venres 21 de novembro e que se centrará na xornada dos PAC, advirten que non aceptarán “máis trampas”.

“O debate debe ser sobre os criterios de cómputo da xornada e non sobre como obrigar aos traballadores a perder horas ou regalar tempo de traballo. Non imos permitir que nos rouben dereitos nin tempo de vida”, conclúen.