Rueda eloxia a visita dos Reis ás zonas afectadas polos incendios: “Foi moi positiva”

Alfonso Rueda cualificou como “moi positiva” a visita que os Reis realizaron este xoves ao concello ourensán de Verín. “Creo que esta visita foi moi positiva. Que eles poidan estar directamente nos lugares que hai poucos días ardían e que agora que a situación mellorou un pouco poidan ver as consecuencias”.

Durante a visita, indicou Rueda, os monarcas puiden escoitar directamente aos afectados, ao persoal que traballou na extinción e incluso reflexións trasladadas polos veciños sobre as causas dos incendios.

“Fíxoo como se deben facer estas visitas: con tempo suficiente, escoitando á xente e querendo empaparse da realidade. Agradecemos que estivesen aquí”, sentenciou Rueda.

Veciños e autoridades foron os encargados de trasladar aos Reis o impacto que os incendios teñen sobre a poboación e o medio rural, así como as labores de recuperación que se desenvolven tras a onda de incendios que asolou a provincia de Ourense.

Felipe VI e a raíña Letizia, acompañados pola ministra para a Transición Ecolóxica e o Reto Demográfico, Sara Aagesen, iniciaron a súa visita no Centro de Coordinación do Distrito Forestal XIV.

Os monarcas chegaron en helicóptero a Verín, onde foron recibidos entre aplausos e vítores dos veciños, xunto ao presidente da Xunta, Alfonso Rueda; a conselleira de Medio Rural, María José Gómez; o alcalde de Verín, Gerardo Seoane; e o rexedor de Monterrei, José Luis Suárez, entre outras autoridades.

Agradecementos

Unha vez no interior do centro, dirixíronse á sala de control onde coñeceron, da man da xefa do Servizo Provincial de Incendios de Ourense, Sandra Martínez, a situación da provincia e das tarefas que se realizan actualmente sobre o terreo.

Despois diso, os monarcas agradeceron aos representantes dos equipos de emerxencia, entre os que se atopaban membros da UME, Brilat, do Corpo de Bombeiros da República Portuguesa, Garda Civil, Brigadistas, entre outros, o traballo realizado nas zonas afectadas polos incendios.

Os reis tamén se interesaron pola saúde dos feridos e Felipe VI fixo un recoñecemento “moi especial e moi agradecido” aos efectivos que estes días traballaron para salvar vidas e loitar contra os incendios.

“Gratitud, recoñecemento e tamén comprensión porque só cada un de vós sabe o que tivo que pasar, as dificultades, superar as propias competencias e posibilidades para poder facer o traballo como fixestes”, expresaron os monarcas.

A continuación, desprazáronse ata unha explotación gandeira de Cualedro onde os gandeiros lles trasladaron o impacto destes lumes no sector.

O alcalde de Monterrei cualificou a visita dos Reis como “moi próxima” e “importante”. “Estas visitas dánnos moito ánimo e forza”, afirmou o rexedor.

Os veciños, segundo detallou, lles trasladaron aos monarcas a situación do rural á que “é necesario dar un cambio” e a reclamación principal da cidadanía foi a limpeza dos montes e a protección dos núcleos de poboación.

Asimesmo, os Reis explicaron que “querían estar” en Ourense para escoitar aos veciños “verlles as caras” e coñecer o “drama humano” que supuxeron os incendios e a perda económica.