Santiago penalizará aos propietarios con vivendas baleiras cun recargo de ata o 150% no IBI.

O Concello de Santiago deu o visto bo á aplicación dun recargo de entre o 50 e o 150% no imposto de bens inmobles (IBI) a vivendas desocupadas, sempre que cumpran determinadas condicións. O consistorio aprobou unha modificación das ordenanzas reguladoras de ingresos públicos co voto a favor dos membros do Executivo local (BNG e Compostela Aberta), PSOE e edís non adscritas.

Dito recargo aplicarase nos casos en que as vivendas estean desocupadas durante dous ou máis anos e cuxos propietarios sexan titulares de catro ou máis inmobles. Para poder aplicar este recargo, o Concello terá que elaborar un censo das vivendas deshabitadas de xeito permanente en Santiago, que elaborará tendo en conta indicios de consumo e do padrón.

A modificación aprobada tamén inclúe outras medidas, como novas bonificacións ás vivendas de promoción pública, unha das categorías de vivenda protexida.

Apoios á votación

En representación das edís non adscritas, Mercedes Rosón trasladou o seu acordo con medidas a favor da solución da cuestión da vivenda e a mobilización do parque de vivendas desocupadas.

Con todo, puxo en dúbida o alcance “real” da medida, que prognosticou que será “limitado” e “sen efectos inmediatos” baseándose na limitación das competencias municipais neste ámbito. “Hai que ser conscientes de que as competencias en materia de vivenda é a Xunta de Galicia e, por tanto, calquera competencia local será limitada”, apuntou.

Pola súa banda, a edil socialista Marta Abal refrendou, na súa intervención, o apoio da súa formación ás modificacións presentadas e cualificou como “interesantes” aquelas referentes ao ámbito urbanístico.

Neste senso, introduciu un matiz: “Estamos de acordo coa idea, non coas formas. Hai unha falta de diagnóstico da vivenda baleira en Santiago para poder acoutar a realidade”. Por iso, o PSOE presentou unha proposición dun censo de vivendas baleiras, que o pleno tratará máis adiante.

A rexeitamento do PP

Por outra banda, o portavoz popular, Borja Verea, considerou que o “debate político” desta modificación está, precisamente, na imposición ás vivendas desocupadas, mentres que ve o resto das modificacións son apreciacións técnicas, nas que o PP non pon ningunha obxección.

Si as pon no recargo a inmobles desocupados, polo que os seus 11 concelleiros votaron en contra dela. Verea defendeu un modelo baseado en “incentivar, promocionar e bonificar”, contrario ao de “castigar e subir impostos”, que, nas súas palabras, representa o do goberno local. Así, trouxo ao pleno propostas como a baixada de impostos a quen alugue a súa vivenda.