O Concello de Santiago recorrerá o 'portazo' da Xunta á declaración como zona tensionada

O Concello de Santiago achegará “todos os datos” e fará todas as reunións “que fagan falta” coa Xunta para que non haxa “escusas” e se declare a cidade como zona de mercado residencial tensionado.

Así o apuntou este luns a concelleira de Capital Cultural, Turismo, Educación e Memoria Histórica de Santiago de Compostela, Miriam Louzao, nunha rolda de prensa ofrecida este luns tras a Xunta de Goberno local e despois de que a Xunta rexeitase a solicitude formulada polo goberno local ao entender que non aportou a documentación requirida para establecer a medida que supón establecer un tope á subida do prezo do aluguer.

Segundo explicou a concelleira, solicitaron copia completa do expediente ao existir, dixo, “máis explicacións” na nota de prensa remitida pola Xunta que na resolución enviada ao concello.

Ademais de avanzar que presentarán recurso de reposición para que siga a tramitación e se teña en conta a súa solicitude, ratificou que hai convocada unha reunión entre representantes municipais e autonómicos para o 1 de setembro.

“Entendemos que non se trata de reunións nin de máis datos”, manifestou sobre a postura do goberno local, aínda que dixo que farán os encontros que fagan falta e achegarán “todos os datos” que lles requiran.

“Para nós o máis importante é que se poidan conter os prezos de aluguer e que se esgoten as escusas e non teñan máis remedio que declárao e por iso a reunión técnica”, insistiu.