O concello de Santiago ve “intencionalidade política” no rexeitamento da Xunta á zona tensionada

O Concello de Santiago ve unha “evidente intencionalidade política” na resolución da Xunta de rexeitar a solicitude de declaración de zona de mercado residencial tensionado e non descarta recorrer por vía administrativa ou xudicial (ou de forma paralela).

Así o apuntou este mércores o concelleiro de Urbanismo, Iago Lestegás, quen subliñou que Raxoi aclarou “punto por punto” nun documento de 13 páxinas o requirimento de enmenda remitido polo Instituto Galego de Vivenda e Solo (IGVS) no que o departamento autonómico sinalaba que os informes do Concello “non se axustan” á lei estatal e o instaba a “enmendar deficiencias”.

Por iso, Lestegás defendeu que non enviarían unha resposta así ao que pedía o IGVS se o Goberno local “quisese desistir”, criticando que a Xunta “dá máis explicacións na nota de prensa que na resolución de desistencia da solicitude”. Unha resolución que, ademais, reprochou o edil, “recibiron antes os medios de comunicación que o Concello”.

Na mesma liña, o concelleiro compostelán argumentou que se a decisión “fose técnica ou xurídica” a Xunta expoñería “máis motivación na resolución que na nota de prensa”, pero na súa opinión, “é ao revés”, o que “evidencia unha intencionalidade política”.

“Á Xunta non lle interesa que se conteña o prezo do aluguer. Como non poden denegar a nosa solicitude porque cumpre os requisitos legais, opta por deixala no limbo”, censurou Lestegás, que tamén cuestionou se “alguén na Xunta leu as 13 páxinas de resposta” porque “non a valoran e ignoran todas as explicacións achegadas”.

Peticións do IGVS

Entre as peticións da Xunta no requirimento, demandábase que completase o plan de medidas correctoras para reverter a situación de mercado tensionado porque as xa incluídas “carecen de incidencia real, dunha mínima concreción ou xa estaban en execución”. A este respecto, Lestegás defendeu que se inclúen medidas que están en execución, pero “ese feito non significa que vaian contribuír a aliviar o mercado residencial”.

Tamén sinalou que comprobou que o plan de medidas correctoras da Coruña, que a Xunta si aceptou, “inclúe medidas correctoras xa executadas” e alí, engadiu, “non foi un problema”, polo que non ve “lóxico que sexa un problema no caso de Santiago”.

En canto á reclamación do Instituto Galego de Vivenda e Solo dun novo documento de diagnóstico “a partir de datos oficiais e non dun portal inmobiliario”, Lestegás volveu a reiterar que entre os datos achegados están cifras do IGVS, que sosteñen que “entre 2019 e 2024 o prezo creceu máis do 40%, mentres o incremento do IPC foi do 20%”. “Só ese dato é suficiente para declarar o noso municipio zona de mercado residencial tensionado”, aseverou.

Por outra banda, a Xunta pedía que explicase a proposta de reducir de dez a cinco o número de vivendas que unha persoa debía ter para considerarse “gran posuidor”, mentres que o concelleiro de Urbanismo subliñou que noutras cidades onde foi concedida a declaración –como nunha vintena de Navarra– “a definición de gran posuidor inclúe os propietarios de cinco ou máis inmobles”, tal e como solicitou Santiago.

Por todo iso, Iago Lestegás volveu a insistir en que Santiago “non desiste nin vai desistir” e avanzou que “fará todo o necesario para desbloquear unha situación” que, apuntou, “non provocou o concello, a provocou a Xunta negándose a aceptar a evidencia de que o noso municipio cumpre os requisitos legais”.

Reunións dos técnicos

Así mesmo, preguntado polo ofrecemento da Xunta de celebrar unha reunión entre técnicos de ambas administracións antes do requirimento, Lestegás criticou que “o PP pretende…