O terremoto de Venezuela sacode a cerimonia das Medallas Castelao

Alfonso Rueda solidarizouse con Venezuela na cerimonia das Medallas Castelao 2026, asegurando que Galicia enteira “vive co corazón apertado” tras o dobre terremoto que azoutou o país. O presidente da Xunta enviou un “abrazo afectuoso” ao pobo irmán venezolano e á comunidade asentada en Galicia. “Todos vivimos esta traxedia como propia”, lamentou. “Este acto institucional representa o conxunto de Galicia, unha comunidade que é o resultado da achega e o esforzo de infinidade de persoas ao longo da historia, aquí e no exterior”, engadiu, asegurando que a solidariedade galega “está e estará no futuro ao lado de Venezuela para axudalos a superar esta desgraza”.

O acto de entrega destas distincións, outorgadas a aqueles galegos que realizaron contribucións singulares, celebrouse na Igrexa de San Domingos de Bonaval e coincidindo co aniversario do primeiro Estatuto de Autonomía e do regreso a Galicia dos restos de Alfonso Daniel Rodríguez Castelao. Os galardoados nesta edición foron o atleta Esteban Batallán, a física Mar Capeáns, o trompetista Adrián Ben, a emprendedora gastronómica María Barallobre e Charo Barca, directora da Fundación Andrea.

Contra as “discriminacións”

No seu discurso, o mandatario autonómico enfatizou que estas medallas son unha “expresión do afianzamento da autonomía de Galicia”, destacando que a Comunidade transitou estas case cinco décadas pola etapa de “maior estabilidade e progreso da súa historia”. “Democracia, autonomía e honestidade son o mellor ecosistema no que cultivar a prosperidade e a estabilidade institucional”, subliñou.

Neste sentido, remarcou que a España constitucional da que forma parte Galicia “non pode admitir o máis mínimo intento de establecer discriminacións” entre cidadáns ou territorios. “A pesar de que con frecuencia intentan impoñernos a cambio de precarios apoios parlamentarios”, apuntou.

Recoñecemento aos premiados

O presidente autonómico puxo en valor as diferentes traxectorias dos galardoados, sinalando que constitúen unha “extraordinaria representación da Galicia” actual ao representar un territorio “xeneroso, que cultiva a excelencia e desborda talento”. Agradeceu á Fundación Andrea por “lembrar a grandeza do ser humano” e “sobrepoñerse ás máis duras adversidades”; ao músico Esteban Batallán por poñer de manifesto o “valor do esforzo” e a “importancia” de aproveitar os recursos formativos galegos.

Tamén destacou á física Mar Capeáns, por “certificar que desde Galicia se pode chegar a participar nos proxectos científicos máis ambiciosos”; ao atleta Adrián Ben, ao que se recoñece o seu esforzo e os valores asociados á práctica deportiva, como son a “disciplina, constancia ou compañeirismo”; e a María Barallobre, por ser unha “figura emblemática” da gastronomía galega.

Para o presidente galego os premiados son “exemplos” da Galicia Calidade edificada cada día entre todos: “Con honestidade, traballo duro e vocación de excelencia, radicalmente afastada de actitudes que atentan contra o bo nome de persoas e institucións que atenden as súas obrigas con rectitude; unha Galicia que ten lealdade institucional e respecto ao ordenamento xurídico; que aposta sempre polo ‘si’ e está aberta ao mundo”.

Os galardoados

Previo á entrega, tras a lectura do decreto polo que se outorga esta distinción, a cargo do conselleiro de Presidencia, Xustiza e Deportes, Diego Calvo, o mandatario autonómico realizou a entrega das distincións aos galardoados. A primeira en recibila foi Charo Barca, en representación da Fundación Andrea, entidade que leva 20 anos realizando a súa labor en apoio ás familias con nenos enfermos. A galardoada asegurou que recibir este recoñecemento é un “auténtico privilexio e unha gran responsabilidade” e dedicoullo ás familias que loitan a diario para saír adiante.

A continuación, foi o turno do trompetista Esteban Batallán, quen reivindicou a Comunidade como unha terra de músicos – na que el mesmo se formou – e a necesidade de “seguir coidando e apoiando” este talento. “Este é un recoñecemento a un sistema que funciona, o noso, dedícollo a todos os músicos de Galicia”, proclamou.

A terceira galardoada foi a física Mar Capeáns, que dirixe as operacións do CERN, o maior laboratorio de física de partículas do mundo. Ao recoller a distinción, Capeáns quixo transmitir aos máis novos que “confíen no seu talento e non acepten os límites” e valorou a aposta pola ciencia no tecido industrial da Comunidade.

De seguido, colocáronlle a medalla ao atleta viveirense Adrián Ben, quen recibiu o premio con “moito orgullo” e “honor”. “Aínda que só son un deportista levarei o nome de Galicia con dignidade en cada pista na que corra. Viva Galicia”, proclamou.

Finalmente, María Barallobre, propietaria de restaurantes ao redor do mundo, recolleu o galardón, asegurando que é unha “rapaza de aldea” e que “igual que Castelao gozaba escribindo, ela goza na cociña”.