Yolanda Díaz ve «ilegal» o plan da Xunta para o fraude nas baixas e ameaza con levalo aos tribunais
A vicepresidenta segunda do Goberno adianta que presentará un recurso ante o Tribunal Constitucional no caso de que a Xunta siga adiante co seu plan para reforzar o control de posibles casos de fraude nas baixas laborais.
A vicepresidenta segunda do Goberno e ministra de Traballo e Economía Social, Yolanda Díaz, atende aos medios de comunicación antes de clausurar o proxecto itinerante ‘Formación en Ruta’ / Europa Press
Comentarios
O plan da Xunta de Galicia para reforzar o control sobre os posibles casos de fraude nas baixas laborais abre un novo fronte co Goberno central. A vicepresidenta segunda e ministra de Traballo e Economía Social, Yolanda Díaz, ameazou á Xunta con interpor un recurso ante o Tribunal Constitucional no caso de que a medida saia adiante.
Alfonso Rueda avanzou no debate sobre o estado da autonomía que “nas próximas semanas” se presentará un programa “integral” que aspira a reforzar o control sobre os posibles casos de fraude nas baixas laborais -coa atención posta nas enfermidades musculoesqueléticas ou de “psiquiatría menor”- e tamén prevé “reforzar o papel das mutuas” na revisión das incapacidades temporais.
“É ilegal”, sentenciou Yolanda Díaz en declaracións aos xornalistas antes de clausurar o proxecto itinerante Formación en Ruta, desenvolvido pola Fundación Estatal para a Formación no Emprego e a Fundación Laboral da Construción. Sobre este punto, a vicepresidenta segunda afirmou que se a Xunta continúa coa medida o Goberno central presentará un recurso de inconstitucionalidade “por invasión competencial”. “Mata dous paxaros dun tiro, pon en cuestión a profesionalidade dos sanitarios públicos, a propia xestión súa da sanidade e está privatizando esta xestión”.
A ministra ferrolá argumentou, ademais, que a medida suporá privatizar “máis” algo que cualificou de “clave”, en referencia á saúde dos traballadores e traballadoras. “A competencia, en primeiro lugar, é dos médicos e das médicas que decretan as baixas médicas en dúas materias de moita sensibilidade”, recalcou tamén para insistir na interposición do recurso de inconstitucionalidade se a Xunta segue adiante coa medida.
