A propietaria de Mar de Frades e Ramón Bilbao aposta polo ‘verde’: o 90% da súa enerxía será renovable ao rematar o ano.

Zamora Company, a compañía que se atopa detrás das marcas Mar de Frades, Ramón Bilbao ou Licor 43, alcanzou en 2024 case un 62% de enerxía renovable consumida, co obxectivo de chegar ao 2025 ao longo deste ano. Segundo figura na súa quinta Memoria de Empresa Consciente, a compañía conseguiu reducir un 8% a pegada de carbono de Alcance 1 e 2, aliñada cos Obxectivo de Desenvolvemento Sostible (ODS) da Axenda 2030.

Segundo explican o exercicio pasado continuaron desenvolvendo unha serie de medidas que lles permitiron alcanzar o obxectivo de reducir ata un 15% as súas emisións de dióxido de carbono para o ano 2025, tomando 2020 como referencia. Entre algunhas das medidas inclúense a eficiencia enerxética, a electrificación de procesos ou a contratación de enerxía renovable.

Tamén durante o exercicio pasado incrementouse a cifra de provedores priorizando a contratación de empresas nacionais, que se mantivo próxima ao 90%.

Outras das medidas impulsadas foron a implementación de etiquetas de papel ecolóxico certificado ou a redución do peso das súas botellas, que permitiu aforrar máis de 100 toneladas de vidro anuais.

Segundo detallou o conselleiro delegado da compañía, Javier Pijoan, o grupo pecha a súa quinta memoria de Empresa Consciente “coa mirada posta nos desafíos que virán, pero tamén coa seguridade de estar no camiño correcto: o dun crecemento rendible, responsable e duradeiro”.

Tamén, como fito medioambiental no ano, Ramón Bilbao conseguiu obter o selo IWCA (International Wineries for Climate Action) na categoría Silver, o que reforzou o compromiso da marca coa sustentabilidade e a redución de emisións de gases de efecto invernadeiro na industria vitivinícola.

Apoio a iniciativas solidarias

Asimesmo, a compañía destinou o 2% do seu beneficio neto anual a iniciativas solidarias que abrangueron desde a axuda a familias vulnerables ata programas de inserción laboral ou apoio a persoas sen fogar.

Ademais, en 2024 a compañía creou un plan de voluntariado corporativo co obxectivo de facer partícipes aos seus empregados e empregadas da acción social do grupo, con accións como a campaña de recollida de material escolar, a participación na iniciativa do Árbol dos Soños de Fundación La Caixa ou o voluntariado para a campaña ‘Vuelta al Cole’ de Carrefour.