SAIC elixe Galicia e fabricará coches eléctricos desde Ferrol e As Pontes
A Xunta aprobará de forma inminente o plan estratéxico para facilitar a chegada do grupo chinés, cuxo proxecto entre Ferrol e As Pontes adiantou Economía Dixital Galicia.
Inauguración dunha fábrica de Saic Motor en Tailandia e un dos modelos de MG / Saic
Comentarios
O grupo chinés SAIC escolleu Galicia para erguer a primeira fábrica de coches eléctricos da marca MG en Europa. Farao no Porto Exterior de Ferrol, aínda que cun proxecto dobre, que complementará cunha planta de compoñentes en As Pontes, tal e como adiantou este medio o 9 de maio. A Xunta declarará proximamente a iniciativa do fabricante como Proxecto Industrial Estratéxico, o que permitirá acurtar á metade o proceso de tramitación.
A chegada de SAIC consuma un obxectivo perseguido desde hai anos pola Xunta, que mantivera conversas con outro xigante chinés dos coches eléctricos, BYD, apoiándose na dispoñibilidade de solo industrial e un forte ecosistema tecnolóxico da automoción, que orbitou no seu desenvolvemento arredor de Stellantis e a súa planta de Vigo.
Nunha primeira fase, o investimento de SAIC será de 250 millóns e xerará 1.000 empregos na comunidade, segundo fontes coñecedoras do proxecto. Segundo avanza a TVG, o proxecto pode escalar ata os 500 millóns de investimento e xerar 5.000 postos de emprego. A factoría ocupará máis de 500.000 metros cadrados no Porto Exterior de Ferrol.
Negociacións en Santiago e Madrid
A confirmación dos plans do fabricante asiático, adiantados por Economía Digital Galicia, chegan tras as recentes viaxes de Pedro Sánchez a China primeiro, e de Alfonso Rueda, xusto despois, con encontros ao máis alto nivel coa cúpula de SAIC por parte do presidente galego. Fontes citadas por La Voz de Galicia sinalaron que, en realidade, os contactos entre o Goberno galego e a compañía asiática estableceronse desde hai máis dun ano para tentar facilitar o aterrizaxe dun desenvolvemento industrial de gran tamaño e polo que competían outros territorios europeos.
O forte crecemento das vendas de MG en Europa espertou o interese de SAIC por contar cunha estrutura industrial en solo europeo, xa que lle permite evitar os aranceis do 45% que impón a UE aos coches cando se importan desde China.
