A Xunta dá luz verde ao novo plan de emerxencias de Alcoa para a súa balsa de lodos.

Luz verde ao novo plan de emerxencia exterior (PEE) do depósito de lodos vermello de Alcoa en Xove. O Consello da Xunta aprobou este luns a revisión deste documento que xa recibira o informe favorable o pasado mes de xullo no pleno da Comisión Galega de Protección Civil.

Deste modo, derrogarase o PEE aprobado en 2012 e acórdase a súa revisión tendo en conta a nova clasificación do residuo que almacena o depósito e a recrecida deste desde a cota 100 á cota 104 metros sobre o nivel do mar (msnm). Isto supón revisar a análise de riscos e o epígrafe de operatividade para establecer as fases e situacións que se indican na Norma básica de Protección Civil.

Estes plans de emerxencia exterior son documentos que se elaboran co obxecto de dar resposta a posibles situacións que se poidan producir e que impliquen perigo para as persoas e bens ou consecuencias graves para o medio ambiente. Neste caso abordouse como consecuencia dun accidente no depósito de barro vermello situado no concello lucense de Xove, cuxo titular é a empresa Alúmina Española.

O plan elaborouse para dar resposta ás situacións de emerxencia derivadas dun hipotético fallo nos diques que pechan o depósito, establecer os sistemas de coordinación coas organizacións das administracións municipais e definir os criterios para a elaboración dos plans de actuación municipal destas. Tamén especifica os procedementos de información á poboación sobre as medidas de seguridade que deban tomarse e sobre o comportamento que se debe adoptar en caso de accidente, ademais de catalogar os medios e recursos específicos á disposición das actuacións previstas e garantir a implantación e o mantemento do plan.